Elordadaǵy kólikterdiń jaryq berý quraldaryna tekserý júrgizilmek
NUR-SULTAN. QazAqparat – 3-5 jeltoqsan kúnderi elordadaǵy kólikterdiń syrtqy jaryq quraldaryna tekserý júrgizilmek, dep habarlaıdy QazAqparat.
Qalalyq polıtsııa departamentiniń habarlaýynsha, bul shara qaýipsizdikti saqtaý aıasynda júrgizilýde.
«018/2011 «Dońǵalaqty kólik quraldarynyń qaýipsizdigi týraly» keden odaǵynyń tehnıkalyq reglamentine sáıkes avtokólik farlaryna aýyspaly jaryq kózin, daıyndaýshy zaýyt belgilegen jaryq kózi synybyna sáıkes kelmeıtin, atap aıtqanda LED jáne ksenondyq shamdardy qoldanýǵa jol berilmeıdi.Sonymen qatar avtokólikterdiń negizgi jaryq farlary deńgeıinen, ıaǵnı kapottyń deńgeıinde, júksalǵyshqa (avtomashınanyń tóbesine) jáne t.b. qosymsha jaryqtandyrý aspaptaryn ornatýǵa úzildi-kesildi tyıym salynady», - delingen taratylǵan habarlamada.
Kórsetilgen talaptardy buzǵany úshin júrgizýshi Qazaqstan Respýblıkasy Ákimshilik quqyq buzýshylyq týraly kodeksiniń (budan ári - Kodeks) 590-baby 5-bóligi boıynsha 12625 teńge somasyna, sondaı-aq Kodekstiń 590-baby 7-bóligi boıynsha 37 875 teńge somasyna aıyppul salyna otyryp jaýaptylyqqa tartylady.
Avtokólikterdiń memlekettik nómirlik belgisin alyp qoıa otyryp, kommýnaldyq aıyppul turaǵyna qoıý arqyly paıdalanýǵa tyıym salynady.
