Elordadaǵy kólik apaty: Fılıppındikke ota jasalady
NUR-SULTAN. QazAqparat - 2-shi kópbeıindi aýrýxananyń bas dárigeri Ivan Lı keshegi jol-kólik apatynda zardap shekken Fılıppın azamatynyń jaǵdaıy týraly aıtyp berdi, dep xabarlaıdy QazAqparat tilshisi.
Bas dárigerdiń sózine qaraǵanda, Fılıpın elinen kelgen áıel jeke menshik kompanııada jumys isteıdi. Keshe ol soqtyǵysyp qalǵan avtobýstardyń bireýinde otyryp, aýyr jaraqat alǵan. "Qazir ol torakaldy xırýrgııa bólimshesinde jatyr. Aldaǵy bir táýliktiń ishinde oǵan ota jasalady. Keýdeniń ishinde qan aǵýy bar. Qazirgi kezde oǵan kompıýterlik tomografııa jasalýda. Búgin torakoskopııalyq otany jasaýǵa qatysty sheshim qabyldanady. Negizi, ol áıeldiń jaǵdaıy turaqty jáne ómirine qaýip tónip turǵan joq", - dedi I.Lı arnaıy baspasóz máslıxatynda.
Aıta keteıik, búgingi jıynda Ivan Lı keshegi jol-kólik apatynda zardap shekkenderdiń jaǵdaıy týraly aıtyp berdi.
Onyń sózine qaraǵanda, aýrýxanaǵa jetkizilgen bir áıel arqasynan qatty jaraqat aldy. Ony neıroxırýrgııa ortalyǵyna aýystyrýǵa sheshim qabyldandy. Qalǵan adamdarǵa birden kómek kórsetildi.
"Jalpy, keshe bes ota jasaldy. Búginde úsh adamnyń jaǵdaıy aýyr. Biraq kóbisi esin jıdy. Jaǵdaılary turaqty. Sondyqtan olardyń ómirine qaýip tónip turǵan joq dep aıta alamyz. Osylaısha, travmotologııa bólimshesinde 8 adam em-dom alýda. Tarakaldy xırýrgııada eki adam, al jansaqtaý bóliminde úsh adam jatyr", - deıdi I.Lı.
Bas dárigerdiń sózine qaraǵanda, zardap shekken bir áıeldiń aıaǵyn ampýtatsııalaýǵa týra keldi.
