Elordadaǵy kólik apaty: Bir áıeldiń aıaǵy ampýtatsııalandy
NUR-SULTAN. QazAqparat - Elordada avtobýs jol-kólik apatyna ushyraǵan kezde bir áıel otyrǵan jerinde janshylyp qaldy. Ol shyǵaryp alǵannan keıin birden jaqyn turǵan 2-shi kópbeıindi aýrýxanaǵa jetkizildi, dep xabarlaıdy QazAqparat tilshisi.
Bas dáriger Ivan Lıdiń aıtýynsha, ol áıeldiń jaǵdaıy aýyr. Sebebi qysylyp qalǵap eki aıaǵy meljemdelip ketti. "Oǵan birden ota jasaldy. Ókinishke qaraı, oń jaq aıaǵyn saqtaı almadyq. Ony ústindegi úshinshi jilinshiginen ampýtatsııalaýǵa týra keldi. Biraq sol jaq aıaǵy qatty synsa da, biz ony qalpyna keltirdik. Ol aıaǵyn saqtaı alamyz dep oılaımyn. Endi, patsıenttiń qazirgi jaǵdaıy da aýyr. Degenmen, turaqtylyq baıqalady. Biz ıntensıvti em-domdy jalǵastaryp jatyrmyz", - dedi I.Lı arnaıy baspasóz máslıxatynda.
Onyń aıtýynsha, ázirshe aıaqty ampýtatsııalaýǵa arnalǵan bir ǵana ota jasaldy. Aıaqtan jaraqat alǵan basqa patsıentter de bar. "Iá, basqa adamdar da aıaqtan qatty jaraqat aldy. Degenmen, arnaıy fıksatsııa jasaıtyn texnologııany paıdalanyp, barlyǵynyń aıaǵyn barynsha saqtap qalýǵa tyrysamyz. Qol bolsyn, aıaq bolsyn, bárin saqtaımyz. Oǵan qazirgi texnologııalar da múmkindik berip otyr", - dep atap kórsetti I.Lı.
Aıta keteıik, búgingi jıynda Ivan Lı keshegi jol-kólik apatynda zardap shekkenderdiń jaǵdaıy týraly aıtyp berdi. Onyń sózine qaraǵanda, aýrýxanaǵa jetkizilgen bir áıel arqasynan qatty jaraqat aldy. Ony neıroxırýrgııa ortalyǵyna aýystyrýǵa sheshim qabyldandy. Qalǵan adamdarǵa birden kómek kórsetildi. "Jalpy, keshe bes ota jasaldy. Búginde úsh adamnyń jaǵdaıy aýyr. Biraq kóbisi esin jıdy. Jaǵdaılary turaqty. Sondyqtan olardyń ómirine qaýip tónip turǵan joq dep aıta alamyz. Osylaısha, travmotologııa bólimshesinde 8 adam em-dom alýda. Tarakaldy xırýrgııada eki adam, al jansaqtaý bóliminde úsh adam jatyr", - deıdi I.Lı arnaıy baspasóz máslıxatynda.
Aıta keteıik, keshe elordada úlken jol-kólik apaty boldy. Qala mańyna qatynaıtyn júrdek avtobýs qatty jyldamdyqpen baǵdarshamda turǵan avtobýsqa soǵyldy. 301-shi baǵdardyń júrgizýshisi jáne aldyńǵy orynda otyrǵan bir jolaýshy oqıǵa ornynda kóz jumdy.
Soqqy alǵan avtobýs jedel medıtsınalyq járdem kóligi men alda turǵan taǵy bir avtobýsqa soǵyldy.
Atalǵan jol-kólik apatynda zardap shekkenderdiń sany 36 adamǵa jetti.
Astana LRT basshysy Bekmyrza Igenberdınovtyń aıtýynsha, elordadaǵy jol apatynan zardap shekkenderge ótemaqy tólenedi.
