Elordadaǵy kólik apaty: 18 jastaǵy boıjetken aýyr halde jatyr
NUR-SULTAN. QazAqparat – Elordada keshe túnde kópir ústinde 2 kólik soqtyǵysyp, saldarynan 5 adam mert boldy. Jantúrshigerlik jol apatynan aman qalǵan 18 jastaǵy jolaýshynyń jaǵdaıy belgili boldy, dep habarlaıdy QazAqparat tilshisi.
Jol apatynan zardap shekken jolaýshy elordadaǵy akademık Nurlan Batpenov atyndaǵy Ulttyq ǵylymı travmatologııa jáne ortopedııa ortalyǵyna jetkizilgen.
«Keshe jol apatynan keıin 18 jastaǵy qyz óte aýyr halde tústi. Naýqastyń omyrtqasy synǵan jáne travmatıkalyq shok alǵan. Patsıentke shuǵyl ota jasaldy jáne qazirshi jaǵdaıy aýyr», - dep habarlandy atalǵan ortalyqtan.
Buǵan deıin habarlaǵanymyzdaı, keshe túnde elordada kópir ústinde eki kólik soqtyǵysyp, saldarynan 5 adam mert boldy.
Óz kezeginde qalalyq Polıtsııa departamenti aýa raıynyń qolaısyzdyǵynan elordada jol apattarynyń jıileı túskenin habarlady. Jáne jolaýshylardy jol erejesin saqtap, saq bolýǵa shaqyrdy.
