Elordadaǵy kınoteatrlar men qonaqúılerde egý pýnkteri ashylýy múmkin

NUR-SULTAN. QazAqparat – Elordada «Ashyq» júıesiniń qaǵıdaty boıynsha jumys isteıtin nysandar tizimi keńeıtiledi. Bul jaıynda Nur-Sultan qalasynyń ákimi Altaı Kólginov Instagram paraqshasynda jazdy, dep habarlaıdy QazAqparat.

«Kásipkerlerimiz áleýmettik jaýapkershilik tanytyp, egý pýnktterin arttyrý úshin óz alańdaryn usynyp otyrǵany qýantady. Mysaly, Nurlan Smaǵulov «Mega Silk Way» SOO kınoteatrlaryn egý pýnkterine jabdyqtaýdy usyndy. Sondaı-aq qonaq úı ıelerinen usynystar tústi. Qalanyń sanıtarlyq dárigerine, basqarmalarǵa barlyq qajet ınfraqurylymdy daıyndaýdy tapsyrdym», - dedi Altaı Kólginov.

Onyń atap ótýinshe, Memleket basshysynyń tapsyrmasyna sáıkes shaǵyn jáne orta bıznes ókilderine qoldaý kórsetiledi. Mysaly, beıindi vedomstvolar birqatar kásipkerlik obektilerine QR-kod berýge, kireberiste kelýshilerdiń epıdstatýsyn skanerleýge múmkindik beretin «Ashyq» mobıldi qosymshasyn iske qosty. Osylaısha, qatań sanıtarlyq normalardy saqtaı otyryp, kásipkerlik obektileri óz qyzmetin qaıta bastady.

«Ashyq» júıesiniń qaǵıdaty boıynsha jumys isteı alatyn obektiler tizimin keńeıtýdi josparlap otyrmyz», - dedi qala basshysy.

Sonymen qatar Altaı Kólginov Memleket basshysynyń tapsyrmasyna sáıkes, beıindi organdar ShOB-tyń salyqtar men kredıtter boıynsha tólemderin keıinge qaldyrý, salyqtyq jáne kedendik bereshekti májbúrlep óndirip alýdy toqtata turý syndy qosymsha is-sharalardy qabyldaý jumysyn júrgizip jatqanyn aıtady.