Elordadaǵy Qazirgi zaman óner murajaıynda Keńes Odaǵy ýaqytynda farfor zaýyttarynan shyqqan buıymdardyń kórmesi ashyldy
ASTANA. Qańtardyń 27-si. QazAqparat /Gúlmıra Álıakparova/ - Búgin Astanadaǵy Qazirgi zamanǵy óner murajaıynda Valerıı Semenovtyń jeke jınaǵynan Keńes Odaǵy kezinde iri farfor zaýyttarynan shyqqan buıymdardyń kórme-jármeńkesi ashyldy,
dep habarlaıdy QazAqparat. Kórme-jármeńkege kollektsıonerdiń 200-den astam jádigeri qoıyldy.
V.Semenov jubaıymen jáne balasymen birge Keńes ýaqytynda shyqqan farfor buıymdardy jınaý isin 6 jyl buryn bastaǵan jáne jınaq qoryn únemi tolyqtyryp otyrý úshin shet elderge arnaıy saparlar jasaıtyn kórinedi.
Alýan túrli taqyrypta usynylǵan buıymdardyń baǵasy, olardyń jasalý joly men tarıhyna baılanysty 2 myń teńgeden 850 myń teńgege deıin baǵalanyp otyr. Mysalǵa, olardyń arasynan orys jazýshylary Gogol men Pýshkınniń shyǵarmashylyǵyndaǵy keıipkerlerdi, sondaı-aq halyq tirshiligine, ertegilerge, ana men bala mahabbatyna, jan-janýarlar men áskerı adamdardyń qyzmetine arnalǵan músinderdi kezdestirýge bolady.
Murajaıǵa óziniń shaǵyn jınaǵyn qoıǵan taǵy bir kollektsıoner Vıktor Semykınniń aıtýynsha, Astanada 100-den astam jádigershi turady jáne olar uıymdasýshylyqtyń joqtyǵynan, óz ekspozıtsııalaryn, ókinishke qaraı, úılerinde saqtap otyr. Jádigershiler farfor buıymdaryna arnalǵan alǵashqy is-shara olardyń nazaryn aýdartyp, kórmeni basqa taqyryptar boıynsha jalǵastyrýǵa múmkindik beretinine senim artýda.
Kórmege qoıylǵan buıymdar M.Lomonosov atyndaǵy Lenıngrad farfor zaýytynda, sondaı-aq Dýlev, «Verbılkı» Dmıtrov, Gjel, Kıev zaýyttarynan shyqqan.
