Elordadaǵy QAJD qyzmetkerlerine qatysty sotqa deıingi tergeý júrgizilip jatyr
«ІІM Ózindik qaýipsizdik departamentiniń elimizdiń túrli óńirlerinde júrgizgen tergeý áreketteri ótken aptada ınternet alańynda keńinen talqylandy.
Osyǵan baılanysty Nur-Sultan qalasy boıynsha QAJD laýazymdy tulǵalaryna, sondaı-aq Qostanaı jáne Jambyl oblystary Polıtsııa departamentteriniń tergeý bólimsheleriniń orta býyn basshylaryna qatysty sotqa deıingi tergeýler júrgizilip jatqanyn habarlaımyz. Osy faktiler boıynsha tolyq aqparat qazirgi ýaqytta tergeý aıasynda jarııalaýǵa jatpaıdy», delingen habarlamada.
Vedomstvonyń málimdeýinshe, ІІM júrgizilip jatqan reformalarǵa sáıkes óz qataryndaǵy zańdylyqty saqtaý, buzýshylyqty joıý jáne memlekettik qyzmetke kir keltiretin kez kelgen is-qımyldyń jolyn kesý jónindegi júıeli sharalardy iske asyrýdy jalǵastyryp jatyr.
«El basshylyǵy ІІM aldyna sybaılas jemqorlyqty joıý jáne polıtsııa qatarynda tártip ornatý boıynsha mindet qoıǵan kezde, olardyń oryndalmaıtyndyǵy týraly pessımıstik boljamdar aıtyldy. Biraq búgingi tańda jumys nátıjelerin berýde: paraqorlyq faktileri eki ese, sybaılas jemqorlyq qylmystyq quqyq buzýshylyqtar úshten birge azaıdy. Bul ótken jylmen salystyrǵanda aǵymdaǵy jyldyń tórt aıyndaǵy derekter. Bul jumys halyqtyń senim deńgeıin arttyrý jáne azamattardyń polıtsııaǵa degen senimin qaıtarý úshin jalǵasatyn bolady», – dep atap ótti mınıstr Erlan Turǵymbaev.
Vedomstvo basshysynyń tapsyrmasy boıynsha qyzmetkerlerdiń sybaılas jemqorlyqqa qarsy ımmýnıtetin arttyrýǵa, osyndaı quqyq buzýshylyqtardyń aldyn alýǵa jáne jol bermeýge basa nazar aýdarylady. Jeke quramǵa quqyq qorǵaý organdarynyń qyzmetkerleri jasaǵan sybaılas jemqorlyq quqyq buzýshylyqtar úshin jaýapkershilikti qatańdatý bóliginde qylmystyq zańnamadaǵy ózgerister túsindiriledi. Qazirgi ýaqytta Ózindik qaýipsizdik departamentiniń júıeli jumysy jalǵasýda.