Elordadaǵy «Qazanat» ıppodromynda at báıgesi ótedi
ASTANA. QazAqparat - 6 shildede elorda tórindegi «Qazanat» ıppodromynda báıge túrlerinen respýblıkalyq týrnır jalaýyn kóteredi, dep habarlaıdy Astana ákimdiginiń resmı saıty.
«Astana kýbogy» úshin ótetin ulttyq sport merekesi eki qashyqtyq boıynsha (alaman - 25 shaqyrym, báıge - 16 shaqyrym) uıymdastyrylmaq. Báıge túrlerinen «Astana kýbogyn» sarapqa salýǵa respýblıkamyzdyń barlyq oblystary, Astana jáne Almaty qalalary 2 júırikten qosa alady.
Astana qalasynyń 20 jyldyǵyn merekeleý aıasynda ótetin báıgeniń jalpy júlde qory - 20 000 000 teńge. 25 shaqyrymdy quraıtyn alaman báıgeniń bas júldesi - 20 000 $ quraıdy.
Báıge túrlerinen ótetin respýblıkalyq týrnır QR Ulttyq sport qaýymdastyǵy jarııalaǵan «Astananyń 20 jyldyǵyna - 20 ulttyq-sporttyq is shara» naýqany aıasynda uıymdastyrylyp otyr.
