Elordadaǵy «Qazaqstan» jáne «Tolqyn» sport keshenderine jóndeý júrgiziledi
NUR-SULTAN. QazAqparat - «Qazaqstan» jáne «Tolqyn» sport keshenderine aýqymdy rekonstrýktsııa júrgizý josparlanǵan, dep habarlaıdy QazAqparat qala ákimdigine silteme jasap.
«Memleket basshysynyń tapsyrmasymen «Qazaqstan» jáne «Tolqyn» sport keshenderine rekonstrýktsııa júrgiziledi. «Qazaqstan» sport kesheni qazirgi tańda hokkeı áýesqoılarynyń ortalyǵyna aınaldy. Onyń ishinde 1 myńdaı eresek adam kiretin 32 komanda, sondaı-aq 440 baladan turatyn 24 komanda bar. Keshende turaqty túrde týrnır ótip turady, byltyr 450 týrnır ótken», - dedi Almaty aýdanynyń ákimi Ádilbek Sársembaev turǵyndarmen esep berý kezdesýinde.
Aýdan ákiminiń aıtýynsha, buqaralyq sportty damytý josparyn júzege asyrý aıasynda byltyr aýdanda trıatlonnan qysqy chempıonat, «ıArkokross», «Kóńildi start», otbasylyq estafeta sekildi 95 sporttyq is-shara uıymdastyryldy. Oǵan aýdannyń 3 myńnan asa turǵyny qatysqan.
«Ótken jyly biz 4 «workout» zona men 6 fýtbol alańyn saldyq. Sonymen qatar 41 sport alańqaıyna jóndeý júrgizdik. Budan bólek, aýdannyń 5 sport kesheninen turatyn sporttyq ınfraqurylymyn kópbeıindi tennıs ortalyǵy tolyqtyrdy. Onyń ishinde 14 kort pen 2 jattyǵý zaly bar. Ortalyqtyń ashylý saltanatyna tanymal tennısshiler Rafael Nadal men Novak Djokovıch qatysty», - dedi ol.
