Elordadaǵy «Qazaqstan» sport saraıynyń qyzmeti ýaqytsha toqtatylady
NUR-SULTAN. QazAqparat - Kúrdeli jóndeý jumystaryn júrgizýge baılanysty Nur-Sultandaǵy «Qazaqstan» sport saraıynyń qyzmeti ýaqytsha toqtatylady, dep habarlaıdy QazAqparat tilshisi «Astana» ÁKK» AQ baspasóz qyzmetine silteme jasap.
Habarlanyp otyrǵandaı, «Qazaqstan» sport saraıynyń tirek konstrýktsııalary men ǵımarat túıinderine keshendi tekserý júrgizilgen. Tekserý nátıjesi boıynsha basseın konstrýktsııasynyń apat aldyndaǵy jaı-kúıi týraly qorytyndy alynyp, basseın qabyrǵalarynyń salmaq kóterý qabilettiligi men ekplýatatsııalyq jaramdylyǵynyń aıtarlyqtaı tómendegeni týraly dálelder keltirilgen.
«Aǵymdaǵy jáne kúrdeli jóndeý jumystaryn oryndamaý jáne jekelegen konstrýktıvtik bólikter men elementterdiń bastapqy senimdiliginiń tómendeýinen konstrýktsııany montajdaý tehnologııasynyń buzylýy sebebinen irgetastardyń, qańqanyń jáne ǵımarattyń qorshaý konstrýktsııalarynyń tehnıkalyq jaı-kúıi tutastaı alǵanda III sanat boıynsha baǵalandy. Atap aıtqanda, nysannyń barlyq kótergish metall konstrýktsııalardyń qosyndylary, ǵımarattyń qasbeti, shatyry, basseın tostaǵandary nazarǵa alyndy», - delingen habarlamada.
«Qazaqstan» sport saraıy 2001 jyly paıdalanýǵa berilgen. Alaıda sodan beri ǵımaratta kúrdeli jóndeý jumystary júrgizilmegen.
«Joǵaryda aıtylǵandardy eskerip, nysanǵa kelýshiler men qyzmetkerlerdiń qaýipsizdigin qamtamasyz etý maqsatynda ǵımaratta kúrdeli jóndeý jumystary júrgizilip, basseın aımaǵyn qaıta qalpyna keltirgenge deıin «Qazaqstan» sport saraıynyń qyzmetin toqtata turý týraly sheshim qabyldandy. Bul shara 2019 jyly 11 sáýirden bastap kúshine endi jáne basseın aımaǵyn qaıta qurý jáne qalpyna keltirý jónindegi barlyq jumystar aıaqtalǵanǵa deıin kúshinde bolady. Nysananyń paıdalaný maqsatyn ózgertý jáne ony buzý týraly tarap jatqan aqparat jalǵan. Qala turǵyndarynan jeke azamattar tarapynan taralyp jatqan aqparatqa senbeýin jáne aqparat taratýda zańsyz áreketterge jol bermeýin suraımyz», - dep habarlaıdy «Astana» ÁKK» AQ baspasóz qyzmetinen.
