Elordadaǵy kásiporynnan iri aqsha jymqyrǵan qyzmetker ustaldy
NUR-SULTAN. QazAqparat – Elorda polıtseıleri qaladaǵy kásiporyndardyń birinde qyzmet etip, iri kólemde aqshasyn jymqyrdy degen kúdikpen er adamdy ustady, dep habarlaıdy QazAqparat Nur-Sultan qalasynyń Polıtsııa departamentine silteme jasap.
Polıtsııaǵa 1 mln 200 myń teńge kóleminde aqshany jumsap qoıý faktisimen elordadaǵy kásiporyn basshysy shaǵymdanǵan.
Tergeý barysynda polıtseıler kásiporyn qyzmetkeriniń ózine shıkizatty satyp alý úshin senip tapsyrylǵan qarajatty alǵan soń ony jumsap qoıyp, odan keıin jumys berýshimen baılanysqa shyqpaı qoıǵany anyqtaldy.
Jedel-izdeý sharalaryn júrgizý kezinde kúdikti azamat anyqtalyp, ustaldy. Buryn tonaý qylmysy úshin jaýapqa tartylǵan elordanyń 36 jastaǵy turǵyny kinásin moıyndady.
Atalǵan faktimen QR Qylmystyq kodeksiniń 189-babymen («senip tapsyrylǵan ózgeniń múligin ıemdený nemese jumsaý») sot aldyndaǵy tergeý amaldary júrgizilip jatyr.
