Elordadaǵy kásipqoı boks keshi: Ivan Dychkonyń qarsylasy anyqtaldy

NUR-SULTAN. QazAqparat – 18 jeltoqsan kúni Nur-Sultanda ótetin boks keshinde qazaqstandyq Ivan Dychkonyń (10-0, 10 KO) kimmen judyryqtasatyny belgili boldy, dep habarlaıdy QazAqparat Sports.kz saıtyna silteme jasap.

Promoýter Zııa Álıevtiń aqparatynsha aýyr salmaqtaǵy boksshymyzdyń opponenti 44 jastaǵy reseılik Aleksandr Ýstınov (36-5-1, 27 KO) bolady. A.Ýstınov buǵan deıingi jekpe-jegin bıylǵy qyrkúıekte ótkizdi. Ol WBC Asia tıtýly úshin aıqasta Vladıslav Sırenkodan (18-0, 15 KO) belgilengen raýndtardyń sońyna jetpeı jeńilip qaldy. Sondaı-aq Aleksandr profıboks mansabynda túrli nusqalar boıynsha ekinshi dárejeli jáne óńirlik tıtýldardyń úmitkeri jáne ıegeri boldy.

I.Dychkoǵa kelsek, ol munyń aldyndaǵy aıqasyn bıylǵy shilde aıynda ótkizdi. Ol reseılik Denıs Bahtovty (39-19, 26 KO) birinshi raýndta nokaýtqa jiberdi.

Buǵan deıin habarlaǵanymyzdaı, 18 jeltoqsan kúni Nur-Sultan qalasynda el Táýelsizdiginiń 30 jyldyǵyna arnalǵan kásipqoı boks keshi ótedi.

Keshtiń basty oqıǵasy jartylaı orta salmaqtaǵy Danııar Eleýsinovtiń (10-0, 6KO) jáne aýyr salmaqtaǵy Ivan Dychkonyń (10-0, 10 KO) jekpe-jekteri bolady.

Olımpıada chempıony D.Eleýsinov birden eki tıtýl: IBF Inter-Continental nusqasy boıynsha álem chempıony jáne IBO tıtýly úshin qolǵap túıistiredi. Onyń qarsylasy ázirge atalǵan joq.

Bul kúni rıngke sondaı-aq, Danııar Eleýsinovtiń inisi Dáýren Eleýsinov (8-1-1, 7 KO) shyǵady.

Profıboks keshi «Habar» telearnasynan kórsetiledi.