Elordadaǵy karaoke barda túnde 200 adam júrgen

NUR-SULTAN. QazAqparat – Elordanyń Taýarlar men kórsetiletin qyzmetterdiń sapasyn qadaǵalaý basqarmasy, ákimdik qyzmetkerleri, eriktiler jáne polıtseılerden qurylǵan monıtorıng toptary karantın rejımin saqtaýǵa qatysty reıd ótkizdi, dep habarlaıdy QazAqparat qalalyq Polıtsııa departamentiniń baspasóz qyzmetine silteme jasap.

Qala turǵyndary birqatar shekteý sharalary belgilengen qoldanystaǵy qaýlyǵa qaramastan kóńil kóterý mekemelerine barýdan bas tartpaı otyr.

Demalys kúnderi polıtsııa departamenti bólimsheleriniń qyzmetkerleri qaladaǵy Taýarlar men kórsetiletin qyzmet sapasyn qadaǵalaý basqarmasynyń qyzmetkerlerimen birlesip, 95 kásipkerlik nysanyn tekserip, 12 karantın rejımin buzǵan faktini anyqtady.

Osylaısha, keshe saǵat 22:30-da mobıldi toptar «Chto býdet dalshe?» karaoke barynyń jumys kestesin saqtamaı, kelýshilerdi qabyldaý faktisin anyqtady. Bardyń ishinde 200 adam bolǵan. Kóńil kóterip júrgen jastar maska taqpaı, áleýmettik qashyqty múldem umytqan.

Karantın rejımin tek oıyn-saýyq mekemeleriniń ıeleri ǵana buzyp júrgen joq. Túngi reıd barysynda mobıldi top tyıym salynǵan ýaqytta jumys istep turǵan kompıýter klýbtary men dúkenderdi anyqtady.

Karantın rejımin saqtamaýshylarǵa qatysty jınalǵan materıal QR Ákimshilik quqyqbuzýshylyqtar týraly kodekstiń 425-baby boıynsha Taýarlar men kórsetiletin qyzmet sapasyn qadaǵalaý basqarmasyna jiberildi.

Qalalyq polıtsııa departamenti karantın tártibin buzýshylar qazirgi zańnamaǵa sáıkes jaýapqa tartylatynyn eskertip otyr.