Elordadaǵy karantın statsıonary shetelden kelgen jolaýshylardy qabyldaı bastady
NUR-SULTAN. QazAqparat - Búginde halyqaralyq reıstermen elordaǵa kelgen 150 jolaýshy «Ramada Plaza» qonaq úıindegi karantın statsıonaryna oqshaýlaýǵa alyndy, dep habarlaıdy QazAqparat tilshisi.
Qala ákimdiginiń málimetinshe, qazannyń 5-inen 6-syna qaraǵan túnde elordaǵa shetelden 4 reıs, atap aıtqanda 2 ushaq Birikken Arab Ámirliginen, 2 ushaq Túrkııa Respýblıkasynan kelip qondy. Barlyǵy 483 adam shetelden ushyp keldi. Onyń 333-inde COVID-19 testinen ótkeni týraly anyqtamasy boldy. 20 jolaýshynyń teris nátıje kórsetken sms habarlamasy keıin keldi. Qalǵan 150 adam áýejaıdan aýrýhanaǵa jetkizilip, PTR arqyly zerthanalyq zertteýlerden ótti, densaýlyq jaǵdaılary qanaǵattanarlyq.
«Mundaı sharalar birinshi ret ótkizilip otyrǵan joq. Kóktemde biz shetelden keletin jolaýshylardy karantın statsıonarlaryna ornalastyryp, saraptama júrgizdik. Sondyqtan, bul baǵytta elordanyń densaýlyq saqtaý salasy tolyq daıyn. Jalpy, halyqaralyq reıster jolaýshylaryna 800 tósek-oryn uıymdastyrýǵa daıynbyz», – deıdi densaýlyq saqtaý basqarmasy basshysynyń orynbasary Álııa Rústemova.
Qazaqstan Respýblıkasy Bas memlekettik sanıtarlyq dárigeriniń 2020 jylǵy 5 qazandaǵy qaýlysyna sáıkes, dene temperatýrasy joǵary adamdar, anyqtamanyń bolýyna qaramastan, ınfektsııalyq statsıonarda oqshaýlaýǵa jatady.
COVID-19 zerthanalyq zertteýleriniń nátıjelerin alǵannan keıin oń nátıjesi bar adamdar juqpaly aýrýlar aýrýhanasyna aýystyrylady, teris nátıjesi barlarǵa COVID-19 belgileri týraly túsindirme júrgizilip, úıge jiberiledi.
