Elordadaǵy Qalıbek Qýanyshbaev atyndaǵy teatr 25 jyldyǵyn atap ótti
ASTANA. QazAqparat - «Astana» kontsert zalynyń sahnasynda Qalıbek Qýanyshbaev atyndaǵy memlekettik akademııalyq qazaq mýzykalyq drama teatrynyń 25 jyldyǵyna arnalǵan gala-kontsert ótti. Elorda ákimdiginiń qoldaýymen uıymdastyrylǵan sharaǵa mádenıet pen óner salasynyń kórnekti qaıratkerleri, jastar uıymdarynyń ókilderi jáne elorda turǵyndary men qonaqtary qatysty, dep habarlaıdy atalǵan vedomstvonyń baspasóz qyzmeti.
Teatrdyń shyǵarmashylyq ujymyna órkendeý men jemisti jumys tilegen Memleket basshysynyń quttyqtaý hatyn Astana ákimi Áset Isekeshev saltanatty túrde oqyp berdi.
«Qalıbek Qýanyshbaev atyndaǵy teatr - Astananyń belgili jáne aldynǵy qatarly mádenıet ortalyqtarynyń biri. Teatr qyzmet etken jyldary otandyq jáne álemdik dramatýrgııanyń túrli janrdaǵy ozyq týyndylaryn sátimen sahnalap, Astana kórermenderi men kelýshi qonaqtardyń ystyq yqylasyna bólenip úlgerdi. Qala ákimdigi teatrdyń damýyna erekshe kóńil bólip otyr jáne onyń artısterine áleýmettik-materıaldyq kómek kórsetýde. Shyǵarmashylyq ujymǵa jańa belesterdi baǵyndyrýdy tileımin», - dep atap kórsetti Áset Isekeshev teatrdyń kórkemdik jetekshisi Talǵat Temenovke QR Prezıdentiniń quttyqtaý hatyn tabys ete otyryp.
Teatrdyń 25 jyldyǵyna arnalǵan sharalar 15-16 qarasha kúnderi ótkizilýde. Merekeleý barysynda elorda turǵyndary men qonaqtaryna mazmundy mádenı baǵdarlama usynylady, onyń sheńberinde rejısser J. Omarovtyń, Qazaqstannyń halyq artısi jáne rejısseri Q. Jetpisbaevtyń, Halyq qaharmany, rejısser Á. Mámbetovtyń shyǵarmashylyǵyna arnalǵan «Qýanyshbaev teatryna - 25 jyl» taqyrybynda dóńgelek ústel ótkizý josparlanǵan. Sondaı-aq, teatrtanýshy Sáýle Ábedınovanyń teatr ómirine arnalǵan «Teatrǵa Taǵzym» kitabynyń tusaýkeseri ótti.
Qalıbek Qýanyshbaev atyndaǵy Memlekettik akademııalyq qazaq mýzykalyq drama teatry Qazaqstan Respýblıkasy táýelsizdiginiń qurdasy bolyp tabylady. Qyzmet etken jyldar ishinde teatr sahnasynda álemniń eń úzdik shyǵarmalary men otandyq dramatýrgtardyń týyndylary qoıyldy. Shyǵarmashylyq ujymnyń qorjynynda Mysyr, Germanııa, Reseı, Iran, Túrkııa, Ózbekstan, Qyrǵyzstan elderinde ótken teatr festıvalderiniń kóptegen marapattary bar.
