Elordadaǵy iri saýda oıyn-saýyq ortalyqtary men bazarlarda polıtsııa beketterin qoıý kerek - prokýratýra
ASTANA. QazAqparat - Elordadaǵy iri saýda oıyn-saýyq ortalyqtary men bazarlarda polıtsııanyń statsıonarly beketterin qoıý kerek.
Bul týraly búgin Zańdylyqty, quqyqtyq tártipti jáne qylmysqa qarsy kúresti qamtamasyz etý boıynsha Astana qalasy Úılestirý keńesiniń kezekti otyrysynda Astana qalasy prokýrorynyń birinshi orynbasary Tımýr Súleımenov málim etti.
«2013 jyldan beri prokýratýra iri saýda oıyn-saýyq ortalyqtary men bazarlarda polıtsııanyń statsıonarly beketterin qoıýdy usynýda. Bizdiń oıymyzsha, bundaı qadamdar qylmystar men qoǵamdyq tártiptiń ózge de quqyq buzýshylyqtaryna shuǵyl áreket etýge yqpal etedi»,-dep toqtaldy T. Súleımenov.
Osy oraıda ol iri ortalyqtardyń ákimshilikterine atalǵan beketterdiń qyzmet etýiniń jaǵdaıy men tártibi eskertilgenin jetkizdi. Bastapqyda osyndaı beketter «Han Shatyr», «Azııa park» sekildi ortalyqtarda jumys istegen bolatyn.
«Keıinnen olardyń jumystary toqtap qaldy. ІІD buny jeke qyzmetkerlerdi osy maqsattarǵa bólý múmkindigi joq ekenimen túsindirip otyr. Degenmen de olar osy jerlerde qoǵamdyq tártipti qorǵaýdyń balamaly nusqalaryn usynbaı otyr»,-dedi ol.
