Elordadaǵy haıýanattar baǵynda maımyl balanyń saýsaǵyn tistep aldy
ASTANA. QazAqparat - Astanada turatyn kelinshek «Astanadaǵy qaıyrymdy adamdar klýby» atty topqa «Astana Mall» saýda úıinde ornalasqan «ENOTııA» atty janama haıýanattar baǵynda onyń jıenin maımyl tistep alǵanyn aıtyp, baıbalam saldy, dep habarlaıdy QazAqparat.
«Senbi kúni óz balalaryma ertip jıenimdi «Ajar» («Astana Mall») saýda ortalyǵyndaǵyndaǵy janama haıýanattar baǵyna apardym. Maımyldy tamashalap bolǵan soń, oǵan tamaq berdik, sosyn bizdi ertip júrgenhaıýanattar baǵynyń qyzmetkeri túlkini ustap kórińizder dep keńes berdi. Túlkiniń tory maımyldyń janynda edi. Bizdi ertip júrgen qyz birinshi bolyp túlkiniń toryna kirdi, artynan meniń balalarym ere kirdi, sońynan men kirdim. Ol qyz maǵan tordyń esigin jaýyp qoıyńyz dedi. Men esikti jabaıyn dep buryla bergende, jemis-jıdek salynǵan stakandy ustap turǵan jıenim maımyldyń toryna qaraı qysylyp qalǵandaı boldy da, saýsaǵyn shoshaıtyp tur eken...Sol sátte maımyl jıenimniń saýsaǵyn tistep alypty. Bala qatty jylap turdy, men aıqaı saldym, al haıýanattar baǵynyń qyzmetkeri túk bolmaǵandaı tura berdi»,-dep jazǵan ınstagramdaǵy klepa_89bk.ru atty paıdalanýshy (avtordyń stılıstıkasy saqtaldy).
Onyń aıtýynsha, janýarlar baǵynyń qyzmetkerleri balaǵa alǵashqy kómek kórsetpegen eken.
«...Maımyldyń densaýlyǵy týraly qujattardy surattym, biraq, maımylǵa qutyrýǵa qarsy ekpe egilgeni týraly qujat joq eken. Balany aýrýhanaǵa aparyp, qutyrýǵa qarsy ekpe qoıǵyzdym. Endi bir aı boıy sol ekpeni alamyz»,-dep tolyqtyrǵan ol jazbasyn.
Haıýanattar baǵyn basqarýshynyń kómekshisi Nurlan Kúshekpaevtyń aıtýynsha, janýarlar baǵyna kelgen árbir adam qaýipsizdik erejesimen tanysady jáne janýarlardyń toryna saýsaq shoshaıtýǵa bolmaıdy. Onyń aıtýynsha, maımyl qutyrý aýrýyna qarsy ekpe alǵan.
«Maımyl turǵan torǵa adamdardy kirgizbeımiz. Kelgen adamdar erejemen tanysqany týraly jýrnalǵa qol qoıady. Biz ol adamdarǵa kirgen bıletteriniń baǵasy qaıtardyq. Maımyl egilgen. Men janýarlarǵa arnalǵan mal dárigeriniń halyqaralyq pasportyn kórsettim, biraq, kelgen áıeldiń kúıeýi basqa betti sýretke túsirip alypty. Haıýanattar baǵynyń qyzmetkerleri qyzdyń saýsaǵyn arnaıy maılyqpen tazalap berdi»,-dep habarlady ol.
