Elordadaǵy «Han Shatyr» SOSO-da merekelik kontsert ótedi

ASTANA. QazAqparat - Búgin Elordadaǵy «Han Shatyr» SOSO-da aýqymdy merekelik kontsert ótedi, dep habarlady saýda oıyn-saýyq ortalyǵynyń ákimshiligi.

Merekelik kontsert Qazaqstan Respýblıkasy Táýelsizdiginiń 26 jyldyǵy qurmetine 16 jeltoqsanda 16.00-de bastalady.

Kesh qonaqtary - halyq ártisteri, Qazaqstan estradasynyń juldyzdy juby Qydyráli Bolmanov pen Qaraqat Ábildına ásem ánnen shashý shashady. Budan bólek bı ujymdary óner kórsetedi.

Sondaı-aq, túrli konkýrstar uıymdastyrylyp, júldeler men syılyqtar tabystalmaq.

Aıta ketken jón, SOSO-nyń bas atrıýmyna kólemi 30*40 metr bolatyn eń úlken jalaý kórik berip tur.