Elordadaǵy «Eýrazııa» kınofestıvaline tanymal prodıýserler keldi
NUR-SULTAN. QazAqparat - 30 maýsymda elordadaǵy «Qazaqstan» Ortalyq kontsert zalynda «Eýrazııa» XV Halyqaralyq kınofestıvaliniń saltanatty ashylýy ótedi, dep habarlaıdy QazAqparat tilshisi.
«Jyl saıyn osy festıval qamtyp otyrǵan óńirler keńeıip keledi. Bıyl Qazaqstan kartınalarymen qatar, Frantsııa, Reseı, Makedonııa, Italııa jáne basqa da birqatar elderdiń fılmderi qatysady dep kútilýde. Sonymen qatar festıvalge keletin qonaqtar da artyp keledi. Olar osy sharadan bólek, jalpy Qazaqstanǵa jáne elimizde kınoındýstrııaǵa qyzyǵýshylyq tanytýda», - dedi QR Mádenıet jáne sport mınıstrligi Mádenıet jáne óner isteri departamentiniń dırektory Ábil Jolamanov.
Onyń aıtýynsha, bıyl festıval aıasynda tanysý saparymen AQSh-tan prodıýserler toby keldi. Olar birlesken jobalardy iske asyrýǵa nıet tanytýda. Bul turǵyda Lionsgate, NBC Universal, Warner Horizon, The Discovery, Global Film Solutions jáne basqa da kompanııalardyń prodıýserleri bar.
Óz kezeginde «Eýrazııa» kınofestıvaliniń prezıdenti Ermek Tursynov atalǵan sharaǵa shynymen de tanymal óner ujymdary shaqyrtý alǵanyn atap ótti.
«Festıval qyzyqty bolady degen senimdemiz. Barlyqtaryńyzdy osy sharalarǵa qatysýǵa shaqyramyn. Bıyl tanymal ári salanyń bilikti mamandary keldi», - dedi E. Tursynov.
Belgili bolǵandaı, aǵymdaǵy jylǵy festıvalde qazylar alqasynyń úsh quramy jumys isteıdi: negizgi baıqaý qazylar alqasy, qysqa metrajdy jáne anımatsııalyq fılmder baıqaýynyń qyzylar alqasy, sondaı-aq NETPAC táýelsiz qazylar alǵasy (azııalyq kınony nasıhattaý jelisi).
Festıval ortalyǵynda tanymal kınematografısterdiń sheberlik-sabaqtar, otandyq kınoındýstrııa úshin ózekti taqyryptarda dóńgelek ústelder uıymdastyrylmaq.
Aıta keteıik, kınofestıvaldiń jabylý rásimi 6 shildede «Qazaqstan» Ortalyq kontsert zalynda ótedi.
