Elordadaǵy Esil óziniń jaǵalaýynda Jeńis merekesine arnalǵan kontsert ótip jatyr
Kontsertte «Saryarqa» halyq mýzyka ansambli, «NAZ» memlekettik bı teatry, E.Rahmadıev atyndaǵy Memlekettik akademııalyq fılarmonııasynyń úrmeli aspaptar orkestri, «Terra» bı teatry men ózge de respýblıkalyq jáne halyqaralyq vokal konkýrstarynyń jeńipmazdary óner kórsetip jatyr.
«Astana qalalyq mádenıet basqarmasy jáne oǵan qarasty basqa da kásiporyndarmen 9 mamyr – Jeńis kúni merekesine arnalǵan kontsert ótkizip jatyrmyz. Birinshi kezekte ol, árıne Uly Otan soǵysy men tyl ardagerlerine arnalady. Kontsertke Astana qalasynyń turǵyndary men barsha qonaqtaryn shaqyramyz. Munda ózimizdiń otandyq kompozıtorlardyń ánderi men soǵys jyldaryndaǵy týyndylar shyrqalady. Sonymen qatar, M. Gorkıı atyndaǵy orys drama teatrynyń ujymy kórermender nazaryna teatrlyq qoıylym usynady», - dep málim etti Astana qalalyq Mádenıet basqarmasy basshysynyń orynbasary Nuran Kamzın.
Merekelik kontsertti tamashalaýǵa kelgen turǵyndar men qala qonaqtarynyń qatary qalyń.
«Bul jeńis ońaı kelgen joq. Ony ósip kele jatqan balalarymyz bilýi kerek. Umytýǵa bolmaıdy! Sondyqtan búgin osyndaı kontsertke nemerelerimdi ákelip otyrmyn. Jeńis merekesi qutty bolsyn!», - dep pikir bildirdi kontsertti tamashalaýǵa kelgen elordalyq turǵyn Gúlzada Esenova.
