Elordadaǵy elektrondy eńbek bırjasynda 10 myńnan astam bos jumys orny bar

NUR-SULTAN. QazAqparat - Jyl basynan beri elordalyq Jumyspen qamtý ortalyǵyna jumysqa ornalasý úshin 12 myńnan astam azamat ótinish bildirdi, onyń ishinde 7 myńnan astam adam jumys tapty. Azamattar enbek.kz elektrondy eńbek bırjasynda ózderine laıyqty bos jumys ornyn izdeı alady, dep habarlaıdy QazAqparat qala ákimdiginiń resmı saıtyna silteme jasap.

Búgingi kúni, ıaǵnı 24 tamyzda E-eńbek bırjasynda Nur-Sultan qalasy boıynsha 10 503 bos jumys orny bar, elordada jumys izdeýshiler 5 myńnan astam túıindeme jiberdi. Jumys berýshiler kúzetshiler men úı-jaılardy jınaýshylar úshin 42500 teńgeden bastap, avıatsııa ınspektorlary men IT-jobalar menedjerleri úshin 600 myń teńgege deıin jalaqy usynady.

Elektrondyq eńbek bırjasynda siz turaqty jumys týraly 3 myńnan astam jarnamany taba alasyz, shamamen 600 – ýaqytsha, 14 – maýsymdyq jáne 8 – qashyqtan.

Búginde elordada suranysqa ıe mamandyqtar tizimine: medıtsınalyq bıke, aǵa medıtsınalyq bıke, tárbıeshi, tárbıeshiniń kómekshisi, satý jónindegi menedjer, kúzetshi, júk avtomobıliniń júrgizýshisi, mashınıst, asúı jumysshysy, satýshy, aspaz, slesar-jóndeýshi, býhgalter, tokar, avtomobıl júrgizýshisi, ákimshi jáne t.b. kiredi.

Úsh jyl buryn dıplom alǵan JOO túlekteri alǵan mamandyǵy boıynsha bastapqy tájirıbe alý úshin jastar praktıkasynan óte alady. Uzaqtyǵy alty aıdan aspaıdy. Aı saıynǵy jalaqy 25 AEK quraıdy. Enbek.kz saıtynda «Jastar tájirıbesi» sanatynda 300 bos jumys orny usynyldy.

«Qoǵamdyq jumystar» baǵyty boıynsha 138 bos jumys orny bar. Bul jumys oryndary aldyn ala kásibı daıyndyqty qajet etpeıdi. Elordanyń halyqty jumyspen qamtý ortalyǵy qala turǵyndaryn ýaqytsha jumyspen qamtamasyz etý úshin áleýmettik paıdaly baǵyttaǵy qoǵamdyq jumystardy usynady. Uzaqtyǵy: 12 aıdan aspaıdy, jalaqysy keminde 2 ETJ (eń tómengi jalaqy) mólsherinde (jalaqy – 85 000 teńge, qolǵa – 73 100 teńge).

Jumysqa ornalastyrý boıynsha saıtta taǵy 20 bos jumys ornyn «áleýmettik jumys oryndary» baǵyty arqyly tabýǵa bolady. Olardy jumys berýshi tabysy az jáne kópbalaly otbasylardyń múshelerin, múgedek balalardy tárbıelep otyrǵan adamdardy jáne halyqtyń áleýmettik osal toptary qataryndaǵy basqa da adamdardy jumysqa ornalastyrý úshin olardyń jalaqysyn sýbsıdııalaı otyryp qurady. Uzaqtyǵy 12 aıdan aspaıdy. Aı saıynǵy sýbsıdııa mólsheri belgilengen jalaqy mólsheriniń 35%-yn quraıdy.

Elordada jumysqa ornalasý týraly tolyq aqparatty halyqty jumyspen qamtý ortalyǵynyń mamandarynan myna telefon nómirleri arqyly alýǵa bolady: 57-88-88, 57-87-00, 8 777 116 82 76.