Elordadaǵy dúkenniń birinde pornografııalyq materıaldar satylǵan
NUR-SULTAN. QazAqparat – «Kontrafakt» is-sharasy barysynda polıtseıler Nur-Sultan qalasyndaǵy dúkenderdiń birinen pornografııalyq materıaldar satylyp kelgenin anyqtady, dep habarlaıdy QazAqparat qalalyq PD baspasóz qyzmetine silteme jasap.
«Atalǵan fakti boıynsha 29 jasar elorda turǵyny ustaldy, ol taýarlar satatyn býtıkterdiń birinde pornografııalyq sıpattaǵy belgileri bar materıaldardy ótkizgen.
Tintý júrgizý is-sharalary kezinde tyıym salynǵan materıaldardan basqa 300-den astam kontrafaktilik aýdıo-beıneónim, 50-den astam lıtsenzııasy joq baǵdarlamalyq qamtylym men kompıýterlik oıyndar tárkilengen», delingen habarlamada.
Ustalǵan adamǵa qatysty QR Qylmystyq kodeksiniń 311-baby boıynsha (pornografııalyq materıaldardy zańsyz taratý) sotqa deıingi tergep-tekserý bastaldy. Sonymen qatar tıisti saraptama taǵaıyndaldy.
«Kontrafakti» jedel-aldyn alý is-sharasyn júrgizý barysynda aqparattyq tehnologııalardy qoldana otyryp 24 qylmystyq quqyq buzýshylyq anyqtaldy, 8 ınternet-alaıaq jáne 1 karta shottan aqsha jymqyrýshy ustaldy.
24 qyrkúıekte Nur-Sultan qalasynda 21 jasar Pavlodar oblysynyń turǵyny ustaldy, ol elorda barlarynyń birinde jumys istep júrip, ártúrli jeleýmen tutynýshylardyń bank kartalarynyń derekterin alyp, artynsha tólem júıeleri arqyly aqsha urlaǵan. Joǵaryda kórsetilgen fakti boıynsha sotqa deıingi tergep-tekserý júrgizilýde.
Polıtsııa departamenti osyndaı jaǵdaıdan saqtaný joldaryn usyndy.
«Eshkimge, onyń ishinde bank qyzmetkerlerine de karta shotynyń jeke málimetterin jáne pın-kodty bermeńiz; bank kartasymen jasamaǵan operatsııany rastamańyz; anonımdi tólem júıeleri arqyly belgisiz adamǵa aqsha aýdarmańyz; kompıýterdegi nemese uıaly telefondaǵy kúmán týdyratyn baǵdarlama men qosymshany paıdalanbańyz; kúmán týdyratyn onlaın saýdadan bas tartyńyz, taýardyń bar-joǵyna beınebaılanys arqyly kóz jetkizińiz; taýardyń aqysyn ony jetkizgennen keıin jáne teksergennen keıin ǵana tóleńiz», delingen eskertýde.
