Elordadaǵy Dostyq úıinde pikir almasý klýby ashyldy

NUR-SULTAN. QazAqparat - Elordadaǵy Dostyq úıinde «Mámile» atty qazaq tili pikir almasý klýbynyń ashyldy, dep habarlaıdy QazAqparat.

Sharany Nur-Sultan qalasy Qazaqstan halqy Assambleıasy uıymdastyrdy. Oǵan elordalyq EMB jáne jastar qanatynyń músheleri, qazaq tili pániniń oqytýshylary jáne ana tiline janashyr qaýym qatysty.

Іs-shara moderatory Nur-Sultan qalasy Qazaqstan halqy Assambleıasy hatshylyǵynyń meńgerýshisi Lázzat Qusaıynova elordadaǵy Dostyq úıinen ashylyp otyrǵan «Mámile» qazaq tili pikir almasý klýbynyń mańyzyn atap ótip, memlekettik til aıasyn keńeıtýge baılanysty aýqymdy jumystardyń júzege asyrylyp jatqandyǵyn málimdedi.

«Jalpy bıyldyń ózinde tól mádenıetimizdi, salt-dástúrlerimizdi, ana tilimizdi jáne barlyq salany damytýǵa baǵyttalǵan birqatar ister atqaryldy. Sonyń bastysy retinde «Qazaqtaný-el birliginiń negizi» atty aýqymdy sharany atap ótýge bolady. Bul rette «Rýhanı» jańǵyrý baǵdarlamasy aıasynda da kólemdi ister atqaryldy. Negizinen, biz memlekettik til mańyzyn arttyrý arqyly túrli saladaǵy aýqymdy jumystardy eńserýge óz úlesimizdi qosyp kelemiz. Osy turǵydan alǵanda, búgingi ashylyp otyrǵan «Mámile» qazaq tili pikir almasý klýbynyń mańyzy óte erekshe», - dedi L. Qusaıynova.

«Mámile» jobasynyń jetekshisi, «Sıtýatıvnyı kazahskıı» ádistemesiniń avtory Qanat Tasybekov, «Ten» lıngvoortalyǵynyń jetekshisi Vladıslav Ten jáne pro­fes­sor, fılosofııa ǵylym­da­rynyń doktory Qazbek Qazkenov memlekettik tildiń mańyzyn atap ótip, ony taza qalpynda sóıleý ári jazý qajettigine basymdyq berdi.

Q. Tasybekovtiń aıtýynsha, búginde elimizde 17 «Mámile» qazaq tili pikir almasý klýby ashylypty. Sonymen birge, ol ár jyldary 3 tom bolyp shyǵarylǵan «Sıtýatıvnyı kazahskıı» ádistemesinde tilge qatysty jetkilikti málimetterdiń qamtylǵanyn jáne tildi erkin meńgerýge bolatyndyǵyn atap ótti.

Jıyn barysynda Nur-Sultan qalasy ákimdigi janyndaǵy «Qoǵamdyq kelisim» kommýnaldyq memlekettik mekemesiniń bas mamany Qadyrbaı Nurpeıisov Nur-Sultan qalasy QHA «Mámile» klýbynyń moderatory bolyp usynylyp, bul boıynsha atqarylatyn ister baǵyty talqylandy.

Qorytyndysynda shara qatysýshylaryna «Mámile» pikir almasý klýbynyń sertıfıkattary tabystalyp, olar estelik sýretke tústi.