Elordadaǵy dinı ahýaldy monıtorıngileýge 40 mln teńge bólýdiń qajeti qansha - «Nur Otan» ókili

NUR-SULTAN. QazAqparat - Elordadaǵy dinı ahýalǵa áleýmettik zertteý júrgizýge 40 mln teńge bólý tym kóp. Bul týraly búgin «Nur Otan» partııasynyń Nur-Sultan qalalyq fılıaly tóraǵasynyń orynbasary Vladıslav Sergeev aıtty, dep habarlaıdy QazAqparat tilshisi.

«Iá, dinı ahýaldy monıtorıngileý qajet ekenin túsinemin. Biraq áleýmettik zertteý júrgizýge jarty jylǵa 40 mln teńge bólemiz be? Menińshe, bul óte joǵary soma jáne shynymdy aıtsam keńes múshesi retinde munyń bizge ne beretinine, qandaı sharalar qoldanylatynyna qatysty eshqandaı aqparatty kórip turǵanym joq», - dedi ol Nur-Sultan qalalyq ákimdigi janyndaǵy qoǵamdyq keńes otyrysynda.

Aıta keterligi, qoǵamdyq keńes otyrysynda Nur-Sultan qalalyq strategııalyq jáne bıýdjettik josparlaý basqarmasy basshysynyń mindetin atqarýshy Aıjan Túgelbaeva 2019 jylǵy qala bıýdjeti týraly baıandama jasady. A.Túgelbaevanyń sózine qaraǵanda, qalalyq qoǵamdyq damý isteri basqarmasynyń bıylǵy bıýdjeti 364,5 mln teńgeni quraıdy. Onyń 40 mln teńgesi óńirdegi dinı ahýaldy zerdeleýge jáne saralaýǵa jumsalmaq.