Elordadaǵy «Demeý» medıtsınalyq ortalyǵy senimdi basqarýǵa berilmek
ASTANA. QazAqparat - Astana ákimdigi elordadaǵy «Demeý» medıtsınalyq ortalyǵyn senimdi basqarýǵa berýdi kózdep otyr. Bul týraly «QazAqparat» agenttiginiń resmı saýalyna bergen jaýabynda Astana qalalyq densaýlyq saqtaý basqarmasy basshysynyń orynbasary Іlııas Bákirov málim etti.
«Qazirgi ýaqytta memlekettik-jekemenshik seriktestigin damytý aıasynda senimdi basqarýǵa beriletin densaýlyq saqtaý nysandarynyń tizimin anyqtaý jónindegi komıssııasy ambýlatorııalyq-emxanalyq qyzmet nysandarynyń ishinen - «Demeý» otbasy medıtsınasy ǵylymı-tájirıbelik ortalyǵyn senimdi basqarýǵa berý máselesin qaraýda», - delingen onyń jaýabynda.
Basqarma baspasóz qyzmetiniń QazAqparat tilshisine xabarlaǵanyndaı, senimdi basqarýǵa zańnamaǵa sáıkes, memlekettik múlikke senimdi basqarýshy retinde jeke jáne memlekettik emes zańdy tulǵa bola alady. Senimdi basqarýshy memlekettik múlikke basqarý júrgizý kezinde shyǵyndardy óteýge quqyly. Óz kezeginde ol quzyrly organ aldynda óz qyzmeti boıynsha esep berýge mindetti.
Aıta keteıik, densaýlyq saqtaý nysandarynyń senimdi basqarýǵa berilýi týraly másele burynnan talqylanýda. Byltyr jeltoqsan aıynda Qarjy mınıstri Baqyt Sultanov Qazaqstanda 2017-2020 jyldar aralyǵynda 124 emxananyń senimdi basqarýǵa beriletindigin málim etken bolatyn.
