Elordadaǵy dámhanalardyń jumys ýaqytyn shekteý usynyldy
NUR-SULTAN. QazAqparat - Elorda polıtsııasy qalada kóńil kóterý oryndarynyń jumys ýaqytyna shekteý engizýdi usyndy. Mundaı usynysty búgin Nur-Sultan qalalyq jergilikti polıtsııa qyzmeti basqarmasynyń bastyǵy Tahır Ábdirahmanov jasady, dep habarlaıdy QazAqparat tilshisi.
«Turǵyn úılerdiń birinshi qabatynda ornalasqan kóńil kóterý oryndarynyń saǵat 23-00-ge deıin, al jeke ǵımarattaǵy oryndar men meıramhanalardyń tek túngi 2-ge deıin ǵana jumys istegendigin qalaımyz. Densaýlyq saqtaý uıymdary da quptar, eger adam túngi saǵat 2-ge deıin iship, odan keıin de ýdaı mas bolyp otyra berse túbi jaqsylyqqa aparmaıdy. Ne ózi qylmys jasaıdy ne kóshede qylmysqa urynady», - dedi ol Nur-Sultan qalalyq kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda.
Sonymen qatar, basqarma basshysy qaladaǵy kóńil kóterý oryndarynyń kúzet qyzmetine qatysty da oıyn bildirdi.
«Biz memlekettik emes kúzet qurylymdarmen yntymaqtastyqty jolǵa qoıdyq. Olar bizge meıramhanalardyń ishinde ǵana járdem kórsetedi. Alaıda ádette meıramhana basshylyǵy janjaldasqandardy meıramhanadan shyǵaryp jiberýge tyrysady. Ne bolsa da ózderinde emes, basqa jerde bolsa bolǵany», - dedi Tahır Ábdirahmanov.
Buǵan deıin habarlaǵanymyzdaı, elordada túngi saǵat 1-den tańǵy 6-ǵa deıingi aralyqta «Hıty HH - veka», «Ystanbul», «Qazaqsha dıskoteka», «Shymkent», «Charlı Chaplın», «Pýnkt P», «Zoloto», «EscoBar» syndy kóńil kóterý oryndarynda qylmys jıi oryn alady. Sondyqtan qazirgi ýaqytta polıtsııa qyzmetkerleri buzaqylyq jıi bolatyn kóńil kóterý oryndary mańynda kezekshilik atqara bastady.
