Elordadaǵy botanıkalyq saıabaq qalalyqtar demalatyn súıikti orynǵa aınalmaq
ASTANA. QazAqparat - Áset Isekeshev elordadaǵy botanıkalyq saıabaqtyń qurylysy barysyn tekserip shyqty. Jospar boıynsha nysannyń tapsyrylý merzimi - 2018 jyldyń shildesi, dep habarlaıdy ákimdiktiń resmı saıty.
Saıabaqtyń jalpy alańy men saıabaq aımaǵy 87 ga. Qazir onyń aınalasyna kóptegen turǵyn úıler salynyp jatyr. Bolashaqta munda ǵylymı-zertteý, aǵartý jumystarymen aınalysýǵa bolady. Botanıkalyq baq týrısterdi de tartatyn orynǵa aınalmaq.
«Osyndaı biregeı Botanıkalyq saıabaqty jasaýdyń ıdeıasy Memleket basshysyna tıesili. Eń bastysy, bul jer qala turǵyndary men qonaqtar úshin jaıly jáne sporttyq alańdarmen de jabdyqtalýy tıis. Bul keńistik barlyq turǵyndarǵa qolaıly bolýy kerek. Osynda kelýshilerdiń ózderin óte jaıly, qaýipsiz sezinýi mańyzdy. Mindetti túrde beınekameralar, statsıonarlyq dárethanalar, sporttyq serýendeıtin súrleý joldar ornatylýy tıis», - dedi qala ákimi.
Botanıkalyq saıabaqta 2 balalar oıyn alańy, 20 trenajer, 2 fýtbol alańy, 4 tennıs alańy, 4 voleıbol jáne 2 basketbol alańy, 14,2 km velojol, 11.8 júgirý joly, demalysqa arnalǵan 4 alań, 8 úlken jaryq jáne 18 kishi aerodınamıkalyq fontan, odan basqa munda WI-FI úshin oryndyqtar ornatylady. Aǵashtardyń jalpy sany 95 myńdy quraıdy.
Búginge deıin saıabaqta 2 jylyjaı, 45 myń sharshy metr alańdy quraıtyn jasandy sý qoımasy, jaıaý júrginshiler kópiri, velosıped jáne júgirý joldary salyndy.
Sonymen qatar shildede Abý-Dabı plaza kesheni men Botanıkalyq saıabaqpen shektesetin Aqmeshit jáne Túrkistan kósheleri aralyǵynda ornalasqan Lıneınyı saıabaǵynyń birinshi kezektegi qurylysy aıaqtalady. Saıabaqtyń aýmaǵynda aǵash otyrǵyzý jumystary júrgizilýde. Qazirgi tańda fontan qurylǵysy ornatyldy.
Lıneınyı saıabaǵynda 2 qurǵaq fontannyń qurylysy, eki balalar alańy, 2.2 km velosıped joly men skeıt alańyn salý josparlanýda.
Áset Isekeshev birneshe turǵyn úılerdiń janynda ornalasqan Lıneınyı saıabaǵynyń ornalasý mańyzdylyǵyn da aıta ketti. Ákimniń aıtýynsha, saıabaq otbasylyq demalysqa arnalǵan atyshýly keremet orynǵa aınalady.
Jalpy 2018 jyly Astana qalasy boıynsha 386 myń aǵash otyrǵyzyldy, onyń 208 myńy elordanyń «Jasyl beldeýine», taǵy 178 myńy saıabaqtar men gúlzarlarǵa egildi. Ótken jyly otyrǵyzylǵan aǵashtar sany 312 myńdy qurady.
