Elordadaǵy Botanıkalyq baqta demalýshylarǵa karantın erejeleri túsindirildi
NUR-SULTAN. QazAqparat – Elordada monıtorıng toby azamattarǵa sanıtarlyq talaptar men erejelerdi túsindirý maqsatynda reıd jumystaryn júrgizdi.
Reıd barysynda tártip saqshylary turǵyndardy maska taǵý rejımi men basqa da qaýipsizdik sharalaryn saqtaýǵa shaqyrdy, dep habarlaıdy QazAqparat tilshisi.
«Koronavırýs ınfektsııasyn juqtyrýshylardyń kóbeıýine baılanysty Nur-Sultan qalasynyń bas sanıtarlyq dárigeri shekteý sharalaryn ústimizdegi jyldyń 2 tamyzyna deıin uzartý týraly sheshim qabyldady. Osyǵan baılanysty, elordanyń polıtsııa departamentiniń qyzmetkerleri aldyn alý jáne túsindirý sharalaryn jalǵastyrýda. Atap aıtqanda, pandemııa kezinde maskalardy mindetti túrde kııý jáne jeke qaýipsizdik erejelerin saqtaý týraly azamattarmen túsindirý jumystaryn júrgizemiz. Prokýratýra, sanıtarlyq-epıdemıologııalyq qadaǵalaý jáne polıtsııa qyzmetkerlerinen turatyn baqylaý toptary quryldy. Olar tamaqtaný, oıyn-saýyq, sport nysandaryna reıdter júrgizedi. Sondaı-aq, azamattarǵa karantındik sharalardy saqtamaǵany úshin qoldanystaǵy zańnamaǵa sáıkes jaýapkershilik qarastyrylǵanyn eske salǵym keledi», - dep túsindirdi Nur-Sultan qalalyq polıtsııa departamentiniń Esil aýdandyq polıtsııa basqarmasynyń bastyǵy Madııar Aıtýǵanov.
Búgin monıtorıng toby Botanıkalyq baqqa baryp, onda demalyp júrgen azamattarǵa túsindirý jumystaryn júrgizip, halyqty Nur-Sultan qalasynyń bas memlekettik sanıtarlyq dárigeri belgilegen sanıtarlyq normalar men talaptarǵa saı erejelerdi saqtaýǵa shaqyrdy.
«Birinshi kezekte eger biz azamattardyń tártipke ádeıi moıynsunbaıtynyn kórsek nemese sol zańbuzýshylyqtar boıynsha azamattar qaıtadan ustalsa, tıisti hattama toltyrylady. Azamattardyń negizgi bóligi túsindirý jumystaryna túsinistikpen qaraıdy. Biraq bul sharalar halyqtyń óz qaýipsizdigi úshin jasalatynyn túsinbeıtinder de bar», - dedi Madııar Aıtýǵanov.
Karantın rejımin saqtamaǵany úshin jeke tulǵalarǵa 30 AEK (83,340 teńge), zańdy tulǵalarǵa 230 AEK (638 940 teńge) aıyppul salynatynyn aıta ketý kerek.
«Biz qoǵamdyq oryndarda, atap aıtqanda saıabaqtar men alańdarda azamattar arasynda túsindirý jumystaryn júrgizemiz. Botanıkalyq baqta turǵyndar demalysyn negizinen otbasylarymen birge ótkizedi. Aıta ketý kerek, siz jalǵyz nemese úsh adamnan aspaıtyn jaǵdaıda júre alasyz. Eger bul talaptar oryndalmasa, turǵyndardy jaýapqa tartýǵa bolady. ıAǵnı olarǵa 30 AEK aıyppul salynady. Biz elorda turǵyndary men qonaqtaryn qoǵamdyq oryndarda betperde kııýge, áleýmettik qashyqtyqty saqtaýǵa, óz densaýlyǵyna jáne basqalardyń densaýlyǵyna qaýip tóndirmeý úshin maska taǵý rejımin saqtaýǵa shaqyramyz», - dep qorytyndylady Nur-Sultan qalasy Esil aýdandyq taýarlar men qyzmetterdiń sapasyn baqylaý jáne sanıtarlyq-gıgıenalyq baqylaý bóliminiń basshysy Aıman Janataeva.
