Elordadaǵy Botanıkalyq baqqa táýelsiz mártebesin berý usynyldy
NUR-SULTAN. QazAqparat – Nur-Sultan qalasyndaǵy Botanıkalyq baqqa táýelsiz mártebesin berý ıdeıasy usynyldy, dep habarlaıdy QazAqparat tilshisi.
Búgin elordalyq belsendiler «Partııa kúni» jobasy aıasynda elordadaǵy «Botanıkalyq baqtyń» máselesin talqylady.
Ashyq aspan astynda ótken talqylaýda eki másele qaraldy, biri baqtyń ekologııalyq jaǵdaıy men tazalyǵy, ekinshi baqty odan ári damytý.
«Elordadaǵy Botanıkalyq baq Almatydaǵy baqtyń fılıaly. Osy oraıda bizdiń Botanıkalyq baqqa táýelsiz mártebesin berý ýaqyty jetti dep oılaımyn. Bul óz kezeginde ǵylymı zerdeleý júrgizýge jáne baq jumysyna qatysty shuǵyl sheshimderdi óz betimizshe qabyldaýda oń septigin tıgizedi»,- dedi Nur-Sultan qalasy Esil aýdanynyń ákimi Berik Jákenov.
Onyń aıtýynsha, «Partııa kúni» aıasynda ótken atalǵan is-shara Botanıkalyq baqqa qatysty zań talaptary jáne basqa da júıelengen suraqtardy sheshýde ońtaıly alań bolyp otyr.
Atalǵan jasyl aımaqqa táýelsiz mártebesin berý ıdeıasyn baqtaǵy ǵylymı ortalyqtyń jetekshisi Sáýle Kákimjanova da qoldady. Ortalyq basshysynyń pikirinshe, Botanıkalyq baqtyń qyzmetine erkindik berý, ony tek demalys orny ǵana emes, ǵylymı uıym retinde de damytýǵa múmkindik týǵyzady.
Aıta ketsek, Nur-Sultan qalasyndaǵy Botanıkalyq baq 2019 jyldan bastap erekshe qorǵalatyn tabıǵı aýmaq bolyp sanalady. Onyń kólemi 98 gektardy quraıdy. Joba eki bólikten turady, onyń ortalyq bóligi ǵylymı zertteýler júrgizýge arnalǵan, qalǵan jeri demalý men sporttyq-saýyqtyrý mánine ıe. Sondaı-aq, baq aýmaǵynda ártúrli 41 myńnan astam aǵash otyrǵyzylǵan.
