Elordadaǵy bir kezdegi eń záýlim qonaq úı nege polıtseılerge berildi
ASTANA. QazAqparat - «Ramada Plaza» qonaq úıi Astana Polıtsııa departamenti úshin «maı shelpek» emes pe?» Bul suraqqa Habar arnasyndaǵy «Ashyq dıalog» baǵdarlamasynda QR Aqparat jáne kommýnıkatsııalar mınıstri Dáýren Abaev jaýap berdi, dep habarlaıdy QazAqparat.
Baǵdarlama barysynda júrgizýshi Astana Polıtsııa departamentiniń qyzmetkerleri burynǵy «Ramada Plaza» qonaq úıine kóshýine baılanysty suraq qoıdy.
«Bul qonaq úıdiń bir kezderi Qazaqstannyń jańa astanasynyń eń záýlim qonaq úıi bolǵanyn bilemiz. Áleýmettik jelide osy máselege baılanysty «bıýdjettegiler úshin bul ǵımarat tym «maı shelpek» bolyp ketken joq pa?» degen suraqqa qatysty áńgime órip júr», - dedi baǵdarlama júrgizýshisi.
Bul suraqqa jaýap bergen Aqparat jáne kommýnıkatsııalar mınıstri Dáýren Abaev Іshki ister departamentiniń ǵımaratynyń salynǵanyn óte kóp ýaqyt bolǵanyn eske saldy.
«Qalalyq Polıtsııa departamentiniń qazirgi ǵımaraty polıtsııa qyzmetkerleriniń búgingi sanyna eseptelmeı salynǵanyn aıta ketý kerek. Ózińiz biletindeı, qala birneshe esege ósti. Halyqtyń sany mıllıonnan asyp ketti. Búgingi tańda qalalyq Polıtsııa departamentiniń qyzmetkerleri óte tar kabınetterde jumys istep jatyr. Bul da qyzmetkerderdiń kóńil-kúıine, tipti bálkim olardyń jumys sapasyna da áser etýi yqtımal. Polıtsııa qyzmetkerleriniń sapaly jumys atqarýyna jaǵdaı jasaýymyz kerektigin eskerýimiz qajet. Ol úshin tıisti ǵımarat bolýy kerek edi», - deıdi Dáýren Abaev.
Mınıstrdiń aıtýynsha, úlkenirek ǵımaratqa kóshý úshin belgili bir nysandy jalǵa alý kerek. Al ony jalǵa alý bıýdjetke taǵy salmaq túsiredi.
«Al qalanyń balansynda «Ramada Plaza» qonaq úıi bar. Al memleket bolsa, qonaq úı bıznesiniń úzdik basqarýshysy emes ekenin túsinetin bolarsyz. Mine, sondyqtan oteldi satý nemese basqa maqsatta paıdalaný kerek. Nysan eski ortalyqta ornalasqanyn eskere otyryp, 20 jyl burynǵy ǵımaratty joǵary baǵaǵa satý - múmkin bolmaıdy. Sol sebepti ol ǵımaratqa qalalyq Polıtsııa departamentin kirgizý - bálkim ońtaıly sheshim», - dep túıdi Dáýren Abaev.
Eske sala ketsek, buǵan deıin Іshki ister mınıstri Qalmuhanbet Qasymov Astana qalasynyń Polıtsııa departamenti Ramada Plaza qonaq úıine ornalasatynyn habarlaǵan bolatyn.
