Elordadaǵy beıne kameralar sany 10 myńǵa jetedi
ASTANA. QazAqparat - Aǵymdaǵy jyly elordadaǵy beıne kameralar sany 10 myńǵa jetedi. Bul týraly búgin «Qala DNK-si: Qoǵamdastyq. Bıznes. Bılik» birinshi ýrbanıstik forýmynda elorda ákimi Áset Isekeshev málim etti, dep habarlaıdy QazAqparat.
«Ómir sapasy jaıynda aıtar bolsaq, biz 34 áleýmettik standart ázirledik. Olar qadamdyq qoljetimdilik ustanymy boıynsha anyqtalǵan. Bular saıabaqtar, sporttyq alańdar, emhanalar, ýchaskelik polıtsııa beketteri, dúkender men balabaqshalar. Biz 129 sektordan turatyn, 10 myńǵa deıin adamdy qamtıtyn baǵdarlama ázirledik. Olardyń barlyǵy da atalǵan standarttarmen qamtylýy tıis», - dedi Áset Isekeshev.
Onyń aıtýynsha, qala ákimdigi 2020 jylǵa deıin qalalyqtar úshin yńǵaıly barlyq áleýmettik jáne ekonomıkalyq standarttardy ázirleýdi maqsat etip otyr.
«Osy jyldyń sońyna deıin 10 myń beıne kamera ornatylatyn bolady. Ázirshe olardyń sany eń mańyzdy oryndarda 3 myńdy quraıdy. Munan bólek 109 qyzmeti jumys istep tur. Turǵyndardy alańdatqan barlyq aqparattardy jınaqtap otyramyz. 5 aıdyń ishinde 300 myń habarlama men qońyraý kelip tústi. Biz olardy kún saıyn qaraımyz jáne qalanyń qaı aýdanynda turǵyndardy ne alańdatatyndyǵyn bilemiz. Máselen, 5 protsentin sýmen qamtýdaǵy irkilester, 10 protsentin qoǵamdyq kóliktegi jaǵdaılar alańdatady. Biz bul máselelerdi tez arada sheshýge kómektesemiz», - dedi elorda ákimi.
