Elordadaǵy Beıbitshilik jáne kelisim saraıyna kúndelikti 300-ge jýyq týrıst barady (FOTO)
ASTANA. QazAqparat - Mamyr men qazan aılary aralyǵynda Astana qalasyndaǵy Beıbitshilik jáne kelisim saraıynda turǵyndar men qala qonaqtary úshin arnaıy ekskýrsııalar ótkiziledi. Ekskýrsııalar qazaq, orys jáne aǵylshyn tilderinde, saǵat 10:00-20:00 aralyǵynda uıymdastyrylady. Halyq arasynda «pıramıda» atanyp ketken ǵımarattyń sáýleti jáne tarıhymen tanysýǵa kún saıyn 300-ge jýyq týrıst keledi.
Bul týraly Astana qalasy ákimdiginiń baspasóz qyzmeti habarlady.
Atalmysh ekskýrsııa kezinde biz qonaqtarǵa eki konferentsııa zaly men opera zalyn kórsetemiz. Opera zaly 1300 orynǵa laıyqtalǵan. Onyń biregeıligi dep kún súgiretinde, 32 sáýle shashyratyp turǵan terezesin aıtýǵa bolady. Qajet jaǵdaıda, jaz maýsymynda bul tereze ashylyp, opera zalyna kún sáýlesi túsip turady, - deıdi ekskýrsovod Dınara Sársenbaeva.
Bul zalda Qazaqstan halqy Assambleıasynyń otyrystary jıi ótedi. Beıbitshilik jáne kelisim saraıy túrli ulttar men ulystar ókilderiniń jıi shoǵyrlanatyn jeri. Saraıda kóptegen etnomádenı ortalyqtar óz jumystaryn júrgizýde.
Eske sala keteıik, Beıbitshilik jáne kelisim saraıy 2006 jyly ashylǵan bolatyn. Saraı qurylysy belgili aǵylshyn arhıtektory Norman Fosterdiń ıdeıasymen júzege asty. Pıramıda qurylysyna 2000 jumysshy tartylyp, barlyǵy 13 aı ýaqyt ketken bolatyn.
