Elordadaǵy «bekire kópir» qalaı salyndy
ASTANA. QazAqparat - Elordanyń Esil ózeni ústimen oń jáne sol jaǵalaýlaryn qosatyn jaıaý júrginshiler men velesıpedshilerge arnalǵan jańa kópiriniń qalaı salynǵandyǵyn beıneleıtin vıdeo jarııalandy. Ol BI Group kompanııasynyń Facebook áleýmettik jelisindegi paraqshasynda, dep habarlaıdy QazAqparat tilshisi.
Kompanııa málimetinshe, kópirdiń qurylys jumystary 181 kúnge sozylǵan. Ony salýǵa 300 qurylysshy men 100 kólik quraly (kran, ekskavator, býldozer, júk mashınasy, júk kóteretin tehnıkalar, tireý qaǵatyn mashına) jumyldyrylǵan. Esil ózeniniń ýaqytsha bógeý jáne kópir salý úshin bóget turǵyzý úshin 30 myń tekshe metr taý tynystary jetkilgen.
Kópirdiń resmı ashylýyna tórt kún qalǵan kezde elorda nóser jaýynnyń astynda qalady. Jaıaý júrginshiler men velesıped tepken adamdarǵa arnalǵan jolaq jabyndysyn tóseý úshin qurylysshylarǵa kópir qurylymyn tolyqtaı 6 myń metrlik polıetılen úlpekpen jabýyna týra kelgen.
Esil ózeni arnasymen sýdyń kedergisiz ótýin qamtamasyz etý úshin arnaıy turǵyzylǵan bógettiń astyna 7 sý ótkizetin qubyr tóselgen.
Aıta keteıik, elordanyń 20 jyldyq mereıtoıyna oraı Atyraý oblysy tartý etken nysannyń jalpy uzyndyǵy - 313,5 metr, eni - 10,5 metr. Kópirde jaıaý júrginshilerge arnalǵan alty metrlik jolaq, velosıpedshilerge arnalǵan úsh metrlik jolaq, sondaı-aq eni 0,5 metr bolatyn qaýipsizdik jolaǵy jáne 0,5 metrlik sharbaqty qorshaýǵa arnalǵan eki jolaq bar. Kópir jabyndysy úshin lıtakrıl paıdalanylǵan. Bul nysan aýa raıy jaǵdaıy eskerile otyryp salynǵan. Ony jobalaǵanda jeldiń áseri de esepke alynǵan. Salmaǵy - 1920 tonna.
