Elordadaǵy «Baıqońyr» turǵyn úı kesheninde órt boldy
ASTANA. QazAqparat - Astanadaǵy «Baıqońyr» turǵyn úı kesheninde órt boldy, dep habarlaıdy QR ІІM TJK resmı ókili Rýslan Imanqulov.
«Búgin túngi 02:12-de elordanyń órt sóndirý qyzmetine «Baıqońyr» turǵyn úı kesheninen órt shyqqany jóninde habarlama kelip tústi. 02:17-de órt sóndirýshiler oqıǵa ornyna jetti. TJ qyzmetkerleri bara salysymen úıdiń 5-9 qabattardaǵy kabel shahtasynan órt shyqqanyn, shamamen 5-20 qabattar aralyǵy tútinge tolyp ketkenin anyqtady. 02:35-te tilsiz jaý tolyǵymen aýyzdyqtaldy», - dep habarlaıdy Rýslan Imanqulov.
Oqıǵa ornynda órt sóndirý jeke quramynyń 50 adamy men 9 negizgi jáne arnaıy tehnıka jumys istedi. Sondaı-aq, QR ІІM TJK Apattar medıtsınasy ortalyǵynyń jáne jedel járdem qyzmetiniń qyzmetkerleri jumys istep, tútinge ýlanǵan 2 adamǵa járdem kórsetti. Barlyǵy 230 adam qaýipsiz jerge shyǵaryldy.
«Qazirgi sátte bizdiń qyzmetkerler qandaı da bir qaýipti anyqtaý úshin páterlerdi aralap, tekserip jatyr», - dedi resmı ókil.
