Elordadaǵy balkony «qısaıǵan» úı mamyr aıynda jóndeledi
NUR-SULTAN. QazAqparat - Elordadaǵy balkonynda jaryq paıda bolǵan «Orbıta» turǵyn úı kesheniniń qasbetin qaıta jóndeý jumystary kelesi jyldyń mamyr aıynda bastalady. Bul týraly Ortalyq kommýnıkatsııalar qyzmetinde ótken brıfıngte Nur-Sultan qalasy ákiminiń orynbasary Altynbek Qaısaǵalıev aıtty, dep habarlaıdy QazAqparat tilshisi.
Buǵan deıin elordadaǵy kópqabatty úılerdiń biriniń edeni dirildep, balkony «qısaıyp» ketkenin jazǵan bolatynbyz.
«Búgingi tańda tıisti sharalar qabyldandy. Qarajat bólinip, tehnıkalyq tekserý júrgizildi jáne joba jasalyp jatyr. Kelesi jyldyń mamyr aıynda turǵyn úı kesheniniń qasbeti, balkony túgeldeı qaıta jóndeledi», - deıdi Altynbek Qaısaǵalıev.
Onyń aıtýynsha, qaıta jóndeý úshin qarajat qarastyrylýda, bul týraly ákimniń qaýlysy bar.
«Buıryqqa qol qoıyldy. Biz bul máseleni sheshemiz. Ol sheshim oqıǵa BAQ-ta jarııalanǵanda, keshe nemese bir apta buryn shyqqan joq. Bul sheshim erterekte, ákim osy nysanǵa barǵan kezde shyqty. Ózderińiz biletindeı, qala ákimi Altaı Kólginov problemasy bar nysandardy ózi aralaıdy. Ol sol kezde sheshim qabyldap, qarajat bólý týraly sheshim shyǵarǵan», - dedi ol.
Búgingi tańda bul úıde 340 otbasy turyp jatyr. Ákim orynbasarynyń aıtýynsha, balkondy tekserý jumystary júrgizilýde.
Eske sala ketsek, elorda ákimdigi balkony «qısaıǵan» kópqabatty úı týraly pikir bildirgen. Sondaı-aq, elordalyq qalalyq orta sapasy jáne baqylaý basqarmasy basshysynyń orynbasary Dáýlet Dosqulov «Orbıta» turǵyn úı kesheninde turý qanshalyqty qaýipsiz ekenin aıtqan bolatyn.
