Elordadaǵy balabaqshalar kezekshi top rejıminde jumystaryn bastaýǵa daıyn
NUR-SULTAN. QazAqparat – Nur-Sultan qalalyq bilim basqarmasynyń basshysy Sholpan Qadyrova balabaqshalardyń jumysyn jandandyrýǵa qatysty túsinik berdi, dep habarlaıdy QazAqparat tilshisi.
«Bıyl 18 mamyrdan bastap menshik nysanyna qaramastan mektepke deıingi barlyq bilim berý mekemeleri kezekshi top rejıminde jumystaryn bastaýǵa daıyn. Eger epıdemıologııalyq jaǵdaı turaqty bolsa, bizder balabaqshalardyń esigin ashamyz. Balabaqshalar sanıtarlyq-dezınfektsııalyq normalardy qatań saqtaı otyryp, balany úıde qaldyrýǵa múmkindigi joq jumys isteıtin ata-analar úshin, odan keıin ǵana basqa ata-analardyń qalaýy boıynsha balalardy qabyldaıdy. Árbir mektepke deıingi uıymdardyń kezekshi toptarynda bala sany 15-ten aspaýy tıis. Eger balabaqshaǵa kelmegen jaǵdaıda, balanyń orny saqtalady», - dedi Sh. Qadyrova onlaın baspasóz máslıhatynda.
Onyń sózine qaraǵanda, bir topta bala sany 15-ten asatyn bolsa, sol balabaqshada taǵy kezekshi toptar ashylady.
«Búginde mektepke deıingi uıymdarǵa qajettilikti anyqtaý úshin ata-analar arasynda monıtorıng júrgizilip jatyr. Ol úshin ata-analar ózderiniń tárbıeshilerine balabaqshaǵa baratyny týraly aqparatty bir kún buryn habarlaýy qajet. Ár balabaqshada kezekshi toptardyń jumys algorıtmi ázirlendi. Barlyq nysandar sanıtarlyq talaptarǵa sáıkes daıyndaldy», - dedi basqarma basshysy.
«Balalardy qabyldaý ýchaskelik pedıatrdyń balanyń densaýlyq jaǵdaıy týraly bergen anyqtamasy bolǵan jaǵdaıda júzege asyrylady. Balany balabaqshaǵa qabyldaý kezinde tárbıeshi medıtsınalyq qyzmetkerdiń baqylaýymen mindetti túrde dene qyzýyn ólsheıdi. Osyǵan baılanysty ata-analardy tárbıeshilerdiń qaýipsiz bolýy úshin jasalyp jatqan sharalaryna túsinistikpen qarap, qoldaý kórsetýlerin suraımyz», - dedi Sholpan Qadyrova.
