Elordadaǵy avtobýs apaty: Zardap shekkender sotqa aryz túsirgeli otyr
NUR-SULTAN. QazAqparat - 26 naýryzda tirkelgen 301-avtobýstyń apatyna qatysty tergeý amaldary 26 maýsymda aıaqtalady, dep habarlaıdy QazAqparat tilshisi.
«Eki adam qaıtys boldy. 33 adam medıtsınalyq mekemege jetkizildi. Biz 26 naýryz kúni oqıǵa negizinde qylmystyq is qozǵadyq. Sot-dárigerlik saraptamaǵa sáıkes, avtobýs júrgizýshisi kólikti aıdap kele jatyp, apatqa jol bergen. Qazirgi tańda is boıynsha tergeý merzimi úshinshi aıǵa sozylyp ketti. 26 maýsymǵa deıin tergeý áreketteri júrgiziledi. Sheshim qabyldaǵannan keıin tolyqqandy aqparat beremiz», - dedi Nur-Sultan qalalyq polıtsııa departamenti basshysynyń orynbasary Ǵazız Nurqaev elordada ótken baspasóz máslıhatynda.
Onyń aıtýynsha, jol-kólik oqıǵasynan zardap shekkender sotqa aryzdanbaq.
«Saraptama jumystary medıtsınalyq qujattarǵa sáıkes júrgizilip jatyr. Sebebi, zardap shekkender ary qaraı sotqa aryz túsirgeli otyr. Osyǵan baılanysty, em aıaqtalǵannan keıin barlyq zardap shekkenderdiń medıtsınalyq qujattaryn tekserip, saraptama taǵaıyndadyq», - dedi ol.
Eske sala keteıik, 26 naýryzda Uly Dala kóshesinde úsh avtobýs pen birneshe jeńil avtokóliktiń qatysýymen iri jol apaty oryn alǵan bolatyn. Sol kúni avtobýs júrgizýshisi Baqdáýlet Álibek 30-dan astam jolaýshyǵa kómek kórsetti.
