Elordadaǵy avtobýs apaty kezinde kómegin aıamaǵan júrgizýshi marapattaldy
NUR-SULTAN. QazAqparat - Nur-Sultan qalasynyń ákimi Baqyt Sultanov birinshi avtoparktiń júrgizýshisi Baqdáýlet Álibekke jol-kólik apatynan zardap shekkenderdi qutqarǵany úshin alǵysyn bildirdi, dep habarlaıdy QazAqparat «Astana LRT» qoǵammen baılanys qyzmetine silteme jasap.
«Sol qaıǵyly kúni elimizdiń árbir azamaty bireýdiń qaıǵysyna ortaqtasa alatynyn, oǵan beı-jaı qaramaıtynyn kórsetti. Óz ómirine qaýip tóngenine qaramastan, olar adamdardy avtobýstan alyp shyǵýǵa kómektesti. Olardyń biri - №303 baǵdardyń júrgizýshisi Baqdáýlet Álibek. Ol oqıǵa ornyna jaqyn jerde bolǵan», - dep atap ótti B. Sultanov.
Eske sala keteıik, 26 naýryzda Uly Dala kóshesinde úsh avtobýs pen birneshe jeńil avtokóliktiń qatysýymen úlken jol apaty oryn alǵan bolatyn. Sol kúni avtobýs júrgizýshisi Baqdáýlet Álibek 30-dan astam jolaýshyǵa kómek kórsetti. Apat bolǵan mezette Baqdáýlet jelide boldy jáne óziniń baǵdary boıynsha júrip kele jatqan kezde apat bolǵanyn kórdi. Kómekke muqtaj adamdardy kórgen Baqdáýlet saspady, avtobýsty toqtatyp, jolaýshylardan kómek kórsetýin ótindi. Úsh adamnyń kómegimen ol esigi ashylmaı qalǵan avtobýstan adamdardy shyǵardy.
Baqdáýlet tótenshe jaǵdaıda durys sheshim qabyldap, uıymdastyrýshylyq qabileti men batyldyǵyn kórsetkeni úshin ákimniń qolynan alǵys hat aldy.
