Elordadaǵy ashyq aýmaqta qurylys materıaldary órtendi
NUR-SULTAN. QazAqparat – Elordadaǵy Jıenqulov kóshesindegi qurylys materıaldary órtendi, dep habarlaıdy QazAqparat tilshisi Nur-Sultan qalasynyń Tótenshe jaǵdaılar departamentine silteme jasap.
Osydan jarty saǵat buryn áleýmettik jelide elordanyń aspanyna kók tútinniń kóterilgen fotosýreti tarap ketken bolatyn.
«Búgin saǵat 10.38 ýaqytynda Órt sóndirý qyzmetine Jıenqulov kóshesi 12/2 mekenjaıynda órttiń shyqqany týraly habarlama tústi. 6 mınýttan keıin oqıǵa ornyna jetken órt sóndirýshiler ashyq aýmaqta qurylys materıaldary (poddondar men penoplekstar) órtenip jatqanyn anyqtady. Jalyn jalpy aýmaǵy 100 sharshy metr jerdi sharpyǵan», - dep habarlaıdy departamentten.
Sonymen qatar qurylys materıaldary toly 40 tonnalyq konteınerge de zaqym kelgen. Saǵat 11.01-de órt aýyzdyqtaldy. Zardap shekkender nemese jaraqat alǵandar joq.
