Elordadaǵy «Analar keńesi» bala tárbıeleý tájirıbesimen almasý úshin «Danalyq marjany» klýbyn qurmaq

ASTANA. QazAqparat - Elordada «Kómek-Help» áleýmettik kómek ortalyǵynda Astana qalasynyń Qazaqstan halqy Assambleıasy analar keńesiniń músheleri metsenattarmen jáne halyqtyń áleýmettik osal toptarynyń ókilderimen kezdesti, dep habarlaıdy qalalyq ákimdiktiń baspasóz qyzmeti.

Kezdesý barysynda «Qaıyrymdylyq kerýeni» aktsııasy aıasynda qaıyrymdylyq jasaýshylar alǵys hattarmen marapattaldy.

Byltyrdan beri Qazaqstan halqy Assambleıasy qaıyrymdylyq qyzmetpen aınalysyp keledi. Osyndaı jobalardyń biri «Qaıyrymdylyq kerýeni» jalpyulttyq aktsııasy bolyp tabylady, onyń basty maqsaty - qoǵamda qaıyrymdylyqty, gýmanızmdi jáne rııasyz kómekti qoǵamdyq kelisim men jalpyulttyq birliktiń basty faktory retinde bekitý.

- Analar keńesi em qabyldap jatqandarǵa jáne materıaldyq kómekke muqtaj jandarǵa kómektesedi. Elordalyq analar keńesiniń arqasynda Astananyń úsh aýdanynda da osy sııaqty keńester quryldy. Olar jer-jerlerde materıaldyq jáne basqa da kómek kórsetýdi qajet etetin otbasylardy óz baqylaýyna alady, - dedi Astana qalasynyń QHA hatshylyǵynyń meńgerýshisi Lázzat Qusaıynova.

Analar keńesine jeti adam kiredi. Aýdandyq deńgeıde de tıisti uıymdar quryldy. Keńes ókilderi balalardy tárbıeleý tájirıbesimen almasý úshin analarǵa - túrli etnos ókilderi úshin «Danalyq marjany» klýbyn qurmaq.

Astana qalasynyń Qazaqstan halqy Assambleıasy janyndaǵy analar keńesi konsýltatıvtik-keńesshi uıymy bolyp tabylady. Keńestiń basty mindeti Qazaqstan halqy Assambleıasyna otbasy ınstıtýtyn nyǵaıtý arqyly qoǵamdyq kelisim men ulttyq birlikti qamtamasyz etý, sondaı-aq, otbasylyq qundylyqtardy taratý boıynsha sharalardy júzege asyrý bolyp tabylady.