Elordadaǵy «Áljan ana» meshitinde minájat etýshiler sany artýda
ASTANA. QazAqparat - Astananyń áýejaıyna aparar jolda menmundalap turǵan «Áljan ana» meshitiniń ashylǵanyna sanaýly ýaqyt qana ótse de, búginde mundaǵy jamaǵat sany kún sanap artyp keledi.
Myń jarymǵa jýyq musylman balasyna arnalǵan qulshylyq úıi «Prıgorodnyı» aımaǵynyń turǵyndarynyń kózqýanyshy, júrek medetine aınalǵan. Namazǵa jınalatyn qaýym men aýyzasharda bas qosatyn halyqqa qarap, meshittiń tynys-tirshiligi óz arnasyna túskeni baıqalady.
Jýyrda ashylǵan meshittiń bas ımamdyǵyna taǵaıyndalǵan Ermek Muqataıdyń aıtýynsha, Astanaǵa at basyn burǵan qonaqtar men sapar shegýshi el azamattary jol boıyndaǵy ózindik shyǵys stılinde kózdi tartatyn meshitke qadam basyp, Quran oqytyp, duǵa etedi.
«Alladan amandyq tilep, sapar aldynda arnaıy meshitimizge bas suǵatyn izgi nıetpen kelýshiler kóbeıip keledi. Al juma kúnderi meshitimiz jamaǵatpen kórkeıedi», - degen bas ımam jańa meshittiń ashylǵanyna ásirese, osy aımaq turǵyndarynyń qýanyshty ekendigin jetkizdi.
Keshegi ótken aýyzasharda jamaǵatty qýana kútken jarqyn júzdi naıb ımam Dáýren Jaqypjan qulshylyq úıiniń el ıgiligine aınalyp, meshit tynysynyń keńeıip kele jatqandyǵyn aıtty.
«Ózderińiz baıqap otyrǵan bolarsyzdar, qala syrtyndaǵy meshitke «Prıgorodnyı» turǵyndarymen qatar, elordalyqtar da arnaıy kelip, namaz oqyp jatyr. Al aýyzashar dastarhany bizde kúndelikti 80-100 adamǵa jaıylady. Búgin 120 adamǵa arnap jasaýdamyz», - deıdi naıb ımam.
Sondaı-aq ol arnaıy aldyrǵan qarıdyq Quran hatym túsirip, jamaǵatqa qyzmet etýde ekenin atap aıtty.
Qadirli aıda esigin aıqara ashqan «Áljan ana» meshiti elordanyń aıshyqty qulshylyq úıine aınalyp, aýyzy berik jandar munda ár kún aýyz ashyp, taraýıh namazdaryn oqyp tarqasýda, dep habarlaıdy ummet.kz.
