Elordadaǵy Almaty oblysynyń jármeńkesi erteń de jalǵasady
ASTANA. QazAqparat - Almaty oblysynyń sharýalary Astanaǵa mol ónim ákelip, halyqty bir keneltti. Jármeńkege kelgen elordalyqtar oqýshylar saraıy mańyndaǵy alańda qoljetimdi baǵamen azyq-túlikti kóptep aldy.
Eki kúnge jalǵasatyn sharada almatylyqtar aýyl sharýashylyq ónimderiniń 45-ke jýyq túrin usynýda, dep habarlaıdy 24.kz.
Tańsáriden sebelegen jańbyrǵa qaramastan Almaty oblysynyń aýyl sharýashylyq ónimi jármeńkesine kelýshilerdiń qarasy qalyń boldy. Elimizdiń shuraıly ólkesinen Astanaǵa 323 tonna kóleminde 45 túrli ónim arnaıy jetkizilgen.
Astana qalasynyń turǵyny Raıhan Ahmetjanovanyń aıtýynsha, kelgen taǵamdardyń sapasy óte joǵary. Bul jármeńke Astana men Almaty oblysy ákimderiniń birlesken kelisimi aıasynda júzege asyp otyr. Sórelerge qoıylǵan ónimderdiń barlyǵy sanıtarlyq-epıdemıologııalyq talaptarǵa saı. Kúndelikti zaýyttan shyǵatyn taǵamnan jalyqqan qala turǵyndarynyń tabıǵı, otandyq ónimge degen qyzyǵýshylyǵy joǵary.
«Astana qalasyndaǵy jármeńkege Alakól aýylynan kelip otyrmyz. Ákelgen ónimimiz kartop jáne jýa men sábiz. Baǵasy qolaıly. Barlyǵy rıza. Rahmetin aıtyp, qaıtadan kelińder dep jatyr. Bizde qýanyshtymyz»,-deıdi satýshy Ádil Ábdikárimov.
Al óz kezegin shydamsyz kútip turǵan tutynýshylar qantty molynan alyp qalýǵa tyrysýda. Naýqan aldynda óńirlerde bul ónimniń baǵasy sharyqtaǵany belgili. Almaty oblysynyń sharýalary bolsa, halyqqa qantty qoljetimdi baǵamen satyp jatyr., Almaty oblystyq aýyl sharýashylyǵy basqarmasynyń basshysy Sársenbaı Bekishovtiń sózine qaraǵanda, Almaty oblysy osy jármeńkelerdi ári qaraı jalǵastyrady. «Bul bir ǵana emes, birneshe jármeńke bolady dep oılaımyn. Óıtkeni halyq pen satýshylar til tabysyp jatsa, bizdiń sózben aıtqanda til tabysý degen olardyń ónimi ótip jatsa, olardyń alýshylary bolyp jatsa, ony ári qaraı jalǵastyra beremiz. Ony uıymdastyrý bizdiń mindetimiz»,-deıdi basqarma basshysy.
Almaty oblysynyń 15 aýdany men 5 qalasynda óndirilgen azyq-túlik jármeńkesi erteń de jalǵasady.
