Elordadaǵy aqtútek boran: Ábigerge túsken turǵyndardan ártúrli vıdeo tarap jatyr
NUR-SULTAN. QazAqparat – Áleýmettik jelilerde elordadaǵy aqtútek boranǵa qatysty túrli vıdeo men foto, tipti jalǵan aqparat ta tarap jatyr. Al Tótenshe jaǵdaılar qyzmeti qajettilik bolmaǵan jaǵdaıda turǵyndardyń úıden shyqpaýyna keńes beredi, dep habarlaıdy QazAqparat tilshisi.
Arqanyń aq borany qardy burqyratyp, uıytqı soǵyp, bul kúnde elordalyqtardy ábigerge salyp-aq tur. Máselen, Ǵarysh ortalyǵy aýdanyna jaqyn Turan dańǵylynyń boıynda tańerteńgi toǵyzdan bastap uzyn-sonar kólik keptelisi paıda bolǵan. Tipti keı adamdardyń jumysyna asyqqany sonshalyq, kóligin jolǵa qaldyryp ketip, jaıaý ketip qalǵan.
Tabıǵattyń dúleı kúshi qaladaǵy qoǵamdyq kólikterdiń qozǵalysyna da kedergi keltirýde. Qoǵamdyq kólikterge jaýapty «Astana LRT» kompanııasy turǵyndardy saq bolýǵa shaqyryp, kólikterdiń aıaldamalarǵa kirmeı qozǵalatynyn eskertti. Avtobýstarǵa qatysty vıdeolardyń biri Úshqoz kentinen tarady. Onda «Kamazdyń» batyp qalýynan, avtobýstar jolǵa shyǵa almaı qalǵan.
Borannyń qarqyny joldaǵy kólikterdiń qozǵalysyn shektep tur. Jeńil kólik túgili keıbir jerde úlken júk kólikterine de ótý múmkin emes.
Astanadan bólek, búkil Arqada uıytqyp turǵan boranǵa baılanysty óńirlerden de túrli aqparattar kelip jatyr. Máselen, bir vıdeoda Temirtaý qalasynyń polıtsııa basqarmasynyń ókili qalalyqtarǵa júginip, qala ishinen syrtqa shyqpaýǵa keńes beredi.
Mamandar qala turǵyndaryna kóshede baǵandardan, aǵashtardan, jarnamalardan, EJJ jáne symdardan alys júrýdi, avtokólikti aǵashtar men eski qurylystardan alshaq qoıýdy, qurylys alańdarynda múmkindiginshe qurylys-montaj jumystaryn shekteýdi usynady. Sondaı-aq, órt qyzmeti, polıtsııa, tótenshe jaǵdaılar departamenti, jedel medıtsınalyq kómek, kommýnaldyq qyzmetter sııaqty qalanyń tynys-tirshiligin qamtamasyz etý uıymdaryn qospaǵanda, aýa raıynyń kúrt nasharlaýyna baılanysty jáne qaıǵyly jaǵdaılardy boldyrmaý úshin memlekettik organdarǵa, bilim berý mekemelerine, kásipkerlik obektilerine (bazarlar, SOO), qurylysqa jumys kúnin qysqartý usynylady.
