Elordadaǵy akademııalyq orys drama teatrynyń basshylaryna sot úkimi shyqty
Bul týraly Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Bekaıdarov onlaın brıfıngide aıtty.
«Nur-sultan qalasy Almaty aýdanynyń №2 aýdandyq sotynyń úkimimen Memlekettik akademııalyq orys drama teatrynyń dırektory 9 jylǵa bas bostandyǵynan aıyryldy. Dırektordyń orynbasary 2 jylǵa shartty túrde, «Adı-Jan» JShS dırektory 8 jylǵa, «Astana-Kókshe» JShS dırektory 8 jylǵa, «ADS-Sapa» JShS tehnıkalyq qadaǵalaý sarapshysy 7 jyl 6 aıǵa, «ST-Injenerıng» JShS tehnıkalyq qadaǵalaý sarapshysy 3 jylǵa shartty túrde bas bostandyǵynan aıyryldy», - dedi Danııar Bekaıdarov.
Onyń aıtýynsha atalǵan azamattardyń ústinen teatr ǵımaratyna kúrdeli jóndeý jáne qalpyna keltirý jumystaryn júrgizý kezinde jalpy somasy 402 mln teńge bıýdjet qarajatyn jymqyrý faktisi boıynsha qylmystyq is qozǵalǵan bolatyn.
