Elordadaǵy 88 mektepke bala psıhologııasyna arnalǵan kitaptar taratylady
NUR-SULTAN. QazAqparat - Nur-Sultan qalasynda «Densaýlyq jáne ómirlik daǵdylar» serııasyndaǵy balalar men jasóspirimderdiń psıhologııalyq densaýlyǵyn nyǵaıtý men damytýǵa baǵyttalǵan kitaptar tanystyryldy, dep habarlaıdy QazAqparat ákimdikke silteme jasap.
Shara aıasynda Bilim Foundation qoǵamdyq qory Bilim basqarmasyna mektepterge arnalǵan 172 kitap jıyntyǵyn tapsyrdy. Kitaptar taqyryby eseıýdiń eń ózekti máselelerin jáne osy jolda kezdesetin ata-analardyń ajyrasýy, emotsııalyq máseleler, kóshý, mekteptiń aýysýy jáne beıimdelý, qorqynysh, úreı, depressııa sııaqty taqyryptardy qamtıdy.
«Bul kitaptar óziniń ishki álemin túsinýge jáne qorshaǵan ortamen baılanys jasaýǵa úıretetin shynaıy oqıǵa keıipkerlerimen, ári qyzyqty sıýjettermen erekshelenedi. Árbir kitapta máseleniń paıda bolý mehanızmderi men ony jeńý úshin qajetti qarapaıym áreketterdi qoljetimdi tilmen túsindiretin strategııalar bar. Qazaq jáne orys tilderine aýdarylyp, qazirgi tańda qoldanýǵa berilip, eki tilde de beınerolık daıyndaldy», - dedi Bilim Foundation qoǵamdyq qorynyń basqarýshy dırektory Berik Raqyshev.
Atalǵan ádebıetterdi QR Densaýlyq saqtaý mınıstrliginiń Respýblıkalyq ǵylymı-praktıkalyq psıhıkalyq densaýlyq ortalyǵy maquldady. Bilim basqarmasy basshysynyń mindetin atqarýshy Sholpan Qadyrova uıymdastyrýshylarǵa alǵys aıtyp, elordadaǵy balalar men jasóspirimderdiń psıhıkalyq saýlyǵyn arttyrýǵa jáne ata-analar men muǵalimderge balamen jumysty durys uıymdastyrýǵa úlken yqpal etetinin aıtyp ótti.
Shara sońynda eki tarap kitaptar jıyntyǵyn 88 mektepke taratý boıynsha yntymaqtastyq týraly kelisimge qol qoıyldy.
