Elordadaǵy 3519 otbasy apatty úılerden kóshiriledi
ASTANA. QazAqparat - Astanada «Qoljetimdi baspana-2020» baǵdarlamasy sátti júzege asyrylýda. Onyń aıasynda kezekke turýshylar, jas otbasylar men Turǵyn úı qurylysy jınaq bankiniń salymshylary baspanamen qamtylmaq.
Sondaı-aq, baǵdarlama sheńberinde apatty úılerdi buzý jónindegi ilki joba da sátimen qolǵa alyndy. Elorda ákimi Ádilbek Jaqsybekov salynyp jatqan birqatar turǵyn-úı qurylys nysandaryn aralap kórdi, dep habarlaıdy astana.kz .
2020 jylǵa deıin atalǵan baǵdarlama aıasynda 680 myń tekshe metr nemese 12 myń páter tapsyrý kózdelýde. Qarasha aıynda jas otbasylarǵa arnalǵan memlekettik komıssııa qol qoıyp, onyń sheńberinde 600 jas otbasyn baspanamen qamtý josparlanýda.
«Búgin qala ákimimen birqatar nysandardy aralap kórdik. Sonyń ishinde apatty úılerdi buzý jónindegi jobaǵa toqtalsam deımin. Atalǵan jobanyń birinshi kezeńinde 3519 otbasyn kóshirýimiz kerek. Joba 2017 jyly aıaqtalady. Ótken jyly 189 otbasyn kóshirilip, 11 úı súrildi. Al, aǵymdaǵy jyldyń jeltoqsan aıynda 31 úı súrilip, 469 otbasy jańa baspanamen qamtylady. Bul jobanyń bir ereksheligi, ony júzege asyrýǵa bólingen qarjy qaıtarymdy»,-deıdi Astana qalasy ákiminiń orynbasary Sergeı Horoshýn.
Jospar boıynsha 2017 jylǵa deıin buzylatyn 228 apatty úıdiń ornyna jańa turǵyn úı keshenderi men basqa da nysandar salynady.
