Elordadaǵy 100 jańa elektrobýs jol aqysyna áser ete me
NUR-SULTAN. QazAqparat – Elordaǵa satyp alynatyn elektrobýstar jol aqysy tarıfine áser etpeıdi. Bul týraly «Astana LRT» JShS basqarma tóraǵasy Bekmyrza Igenberdınov málim etti, dep habarlaıdy QazAqparat tilshisi.
«Keshe ǵana 100 elektrobýsty satyp alýǵa qatysty shartty bekittik. Búginde elordada naqty 100-ge tarta avtobýs jetispeı jatyr. Jyl saıyn biz parkti jańartyp turýymyz kerek. Turǵyndar sany artyp kele jatqanyn eskerý kerek. Sonymen qatar, eskirgen avtobýstar da az emes», - dedi B. Igenberdınov baspasóz máslıhatynda.
Onyń sózine qaraǵanda, bıylǵy jyldyń aıaǵyna deıin 50 elektrobýs jetkiziledi, al 2020 jyldyń birinshi toqsanynda qalǵan 50-i qaladaǵy baǵdarlarǵa qosylady.
«Elordadaǵy barlyq parkterde 1 200-ge tarta avtobýs bar jáne olardyń barlyǵy dızel otynymen júredi», - dep naqtylady «Astana LRT» JShS basshysy.
Budan bólek, Bekmyrza Igenberdınov jańa elektrobýstardy satyp alýdyń nátıjesinde jol aqysynyń tarıfteri ózgermeıtinin atap ótti.
«Jol júrý aqysyna eshqandaı áseri bolmaıdy. Park jyl saıyn jańaryp turady, sáıkesinshe, jańa avtobýstar jetkiziledi», - dedi B. Igenberdınov.
Budan buryn habarlanǵandaı, jaqynda elordadaǵy qoǵamdyq kólik júıesine 100 jańa elektrobýspen tolyǵady.
12 metrlik avtobýstar tómen edendi bolyp keledi jáne 350 shaqyrym jol júrý qory bar lıtıı-temir-polımerli batareıamen jabdyqtalǵan. Batareıanyń qyzmet etý merzimi 10 jyldy quraıdy. Batareıaǵa kepildik – 7 jyl, elektrqozǵaltqyshqa – 5 jyl.
Osy oraıda «SaryarqaAvtoProm» kompanııasy Yutong ZK6128BEVG elektrobýstarymen qamtamasyz etedi. Bir elektrobýstiń quny 146, 7 mln teńge, bul búgingi kúngi baǵam boıynsha shamamen 388 myń AQSh dollaryn quraıdy.
Aatalǵan qoǵamdyq kólikter ulttyq lızıng operatory «QDB-Lızıng» AQ arqyly avtobýs parkin otandyq óndiris tehnıkasymen jańartý boıynsha memlekettik baǵdarlama aıasynda satyp alynady. Lızıng merzimi jyldyq 7 paıyzdyq syıaqy mólsherlemesimen 7 jyldy quraıdy.
