Elordadaǵy 100 elektrobýsqa júrgizýshiler daıyndalyp jatyr - «Astana LRT»
NUR-SULTAN. QazAqparat – Elordaǵa jetkiziletin 100 elektrobýsqa júrgizýshiler daıyndalyp jatyr. Bul týraly «Astana LRT» JShS basqarma tóraǵasy Bekmyrza Igenberdınov málim etti, dep habarlaıdy QazAqparat tilshisi.
Budan buryn habarlanǵandaı, jaqynda elordadaǵy qoǵamdyq kólik júıesine 100 jańa elektrobýspen tolyǵady.
«Kóp jyldardan beri biz avtobýstardyń túrli modelderin paıdalanyp kelemiz, olardyń tehnıkalyq sıpattamasy bizge túsinikti. Bul turǵyda ár modelge tyńǵylyqty qaraý kerek. Osy oraıda ózimizdiń tájirıbemizdi eskere otyryp, sapaly tehnıkanyń mán-jaıynan habardarmyz. Qymbat emes avtobýstardy alyp, olar bir jyldan keıin shashyla bastasa, budan shyǵynǵa tap bolamyz. Bizdiń qala ósip keledi, jyl saıynǵy ósim 5 paıyzdan astam. Turǵyndar qoǵamdyq kólikke belsendi túrde aýysyp jatyr», - dedi «Astana LRT» basshysy baspasóz máslıhatynda.
Onyń aıtýynsha, qazirgi kezde qala turǵyndarynyń suranysyn qanaǵattandyrý maqsaty tur.
«Sáıkesinshe, qaýipsizdik pen paıdalaný qolaılyǵy turǵysynan barlyq talaptarǵa saı tehnıkany alýǵa tyrysamyz. Taldaý nátıjeleri boıynsha elektrobýstardy alý sheshimin qarastyrdyq. Osy rette sapaly ónimdi alyp, eleýli shyǵynsyz bul mashınalar 10 jyl júrip beredi degendi túsiný kerek. Qazirgi kezde júrgizýshilerdi daıyndap jatyrmyz, ıaǵnı osy elektrobýstarǵa biliktiligi bar mamandar otyrǵyzylady. Elektrobýstarda asa kóp bólshek joq, onda negizgi bólsheginiń biri - batareıa. Batereıaǵa kepildik merzimi belgilengen, sondaı-aq servıstik qyzmet kórsetý de eskerilgen», - dedi Bekmyrza Igenberdınov.
