Elordadaǵy jetekshi joǵary oqý oryndarynyń stýdentteri áskerı ant qabyldady
ASTANA. KAZINFORM – Astanada joǵary oqý oryndary janyndaǵy áskerı kafedralardyń úsh júzden astam túlegi Otanyna adal bolýǵa ant berdi.
Іs-shara «Otan Ana» monýmentine gúl shoqtaryn qoıýdan bastaldy. Qurmetti qonaqtar, joǵary oqý oryndarynyń basshylary men oqytýshylary, stýdentter, Qarýly kúshterdiń ardagerleri qazaqstandyq jaýyngerlerdi bir mınýt únsizdikpen eske aldy.
Qurmetti qonaqtar Halyq qaharmany general-leıtenant Baqytjan Ertaev pen general-leıtenant Abaı Tasbolatov kafedra túlekterine mamandyq ıgerýde jáne óz mansabyn qurýda tabys tiledi.
Rásim Qazaqstan Respýblıkasynyń Memlekettik Týyn kóterýden jáne Memlekettik ánuran oryndaýdan bastaldy.
— Qorytyndy emtıhandardy tapsyrý kezinde sizder joǵary bilim men oqytylatyn pánder boıynsha jaqsy nátıje kórsettińizder. Búgin áskerı boryshqa adal bolýǵa ant berip, naǵyz Otan qorǵaýshy atandyńyzdar. Osy ataqqa laıyq bolyńyzdar jáne Qazaqstannyń damýy men órkendeýi úshin bárin jasańyzdar, - dedi Halyq qaharmany Baqytjan Ertaev.
Q. Qulajanov atyndaǵy Qazaq tehnologııa jáne bıznes ýnıversıtetiniń, Nazarbaev Ýnıversıtetiniń, Maqsut Narikbayev University, L. N. Gýmılev atyndaǵy Eýrazııa ulttyq ýnıversıtetiniń, Qazaq ulttyq pedagogıkalyq ýnıversıtetiniń, «Turan», «Esil» ýnıversıtetteriniń, Dene shynyqtyrý jáne buqaralyq sport akademııasynyń stýdentteri Otan qorǵaýǵa kez kelgen sátte daıyn bolýǵa ant berdi.
Joǵary oqý oryndary áskerı kafedralarynyń túlekterin Qazaq tehnologııa jáne bıznes ýnıversıtetiniń prezıdenti Ernur Qulajanov quttyqtady. Ata-analar atynan Rahıla Ýnysheva sóz sóıledi.
Іs-shara qurmet qaraýyly rotasynyń qatysýymen ótti. 68665 áskerı bóliminiń áskerı qyzmetshileri qarý-jaraqpen qoıan-qoltyq urys tásilderi men saptyq defıle elementterin kórsetti.
Ant bergen zapastaǵy serjanttar alańda saltanatty sherýmen júrip ótti. Іs-shara Ortalyq áskerı orkestrdiń mýzykanttary men Qarýly kúshter Ulttyq áskerı-patrıottyq ortalyǵy Ortalyq ansambli solısteriniń óner kórsetýimen aıaqtaldy.
Buǵan deıin áskerı bólimderde zamanaýı IT júıelermen beınebaqylaý ornatylatynyn jazǵan edik.