Elordadaǵy jedel brıgada sarbazdary áskerı ant qabyldady
ASTANA. KAZINFORM — Astanada 5573 áskerı bóliminde jaýyngerler otanǵa adal qyzmet etýge saltanatty túrde ant berdi. Elimizdiń túkpir-túkpirinen kelgen tepse temir úzer jigitter 30 táýlik arnaıy daıyndyqtan ótken. Endi olar bas qalamyzdyń tynyshtyǵy men kóshe tártibin qamtamasyz etýge atsalysady.
Ulttyq Ulan qatarynda boryshyn óteýge kelgen jas tolymdy qurama komandıri general-maıor Esjanov Aıan Abdýǵanıuly quttyqtap, qyzmetterinen baǵyt-baǵdar berdi. Іs-shara barysynda alys-jaqynnan kelgen qaýymǵa bolashaq sarbazdardyń oqý pýntkinde bir aı boıy úırengen daǵdylary kórsetildi.
Áskerı elıta qatarynan kórinetin qurmet qaraýyl rotasynyń sarbazdary karabınmen defıle kórsetse, endi biri qoıan — qoltyq urystan úırengenderin kópshilik qaýymnyń nazaryna usyndy. Ant qabyldaý rásimi dál osylaı óz jalǵasyn tapty.
Bul kúni mańyzdy sátte balalaryna qoldaý bildirý úshin myńnan asa týǵan-týys, ata-ana jınaldy. Botagóz Almuratova óz balasynyń Otan aldynda ant berý rásimin kórý úshin Atyraý qalasynan kelgen. Osy kúni tolqyp turǵanyn jasyrmaǵan ana árbir balanyń úıine abyroımen oralýlaryna tilektes ekendigin aıtady.
Botagóz Almuratova (qatardaǵy Joldas Ersultannyń anasy):
— Búgin balamnyń ant-qabyldaý rásimine kelip turmyn, óte qýanyshtymyn. Balamdy jáne áskerı bólim ujymyn osy aıtýly kúnmen quttyqtaımyn. Ulymnyń osyndaı Elordamyz Astana qalasyna, osy áskerı bólimge túskeninen óte qýanyshtymyn. Іs-shara aqıatalǵan soń, balamdy komandırdiń ruqsatymen belgilengen ýaqytqa deıin syrtqa alyp shyǵamyn.
Al qatardaǵy Qazıhanov Berikjannyń anasy Qazaqstan Respýblıkasynyń Ulttyq Ulanynyń 5573 áskerı bólimindegi ant qabyldaý rásimine osymen ekinshi ret qatysyp otyrǵanyn aıtady. 2018 jyly úlken uly da osy áskerı bólimge boryshyn óteýge shaqyrtylypty. Ata-ana brıgada ujymyna alǵysyn jetkizip, ulynyń bul jerden er azamatqa tán barlyq qasıetterin boıyna sińirip keletinine senim bildirdi.
Ipanova Merýert (qatardaǵy Qazıhanov Berikjannyń anasy):
— Osy áskerı bólimshege ekinshi ret kelýim. Sebebi, ekinshi ulymdy Otan aldyndaǵy boryshyn abyroımen oryndap kelýge jiberdim. Búgin sarbazdar úshin mańyzdy kún, al árbir ata-ana osy sátte tolqyp turǵandaryn baıqaýǵa bolady. Men de solardyń qatarynanmyn, ulymdy kórýge asyǵyp turmyn. Uldarymyz naǵyz er azamat bolyp jetilip, úıimizge aman-esen oralýlaryna tilektespin.
Áskerdegi sarbazdarǵa júkteletin jaýapkershiliktiń júgi salmaqty. Qoıylatyn talap ta joǵary. Bir aı ýaqyt ishinde jańadan kelgen bolashaq sarbazdar jas jaýynger kýrsynan ótedi. Olar temirdeı tártip pen jaýyngerliktiń qyr-syryna úırenedi. Jańa tolym sarbazdary endi ózderiniń bir jyl qyzmetteri barysynda shyńdalǵan er azamat bolyp shyǵady.
Qatardaǵy Qazıhanov Berikjan:
— Men qatardaǵy jaýynger Qazıhanov Berikjan, Jetisý oblysy Taldyqorǵan qalasynan óz erkimmen ásker qataryna shaqyrtyldym. Búgin men úshin aıtýly kún, ant qabyldadym, bári joǵarǵy deńgeıde ótti. Antyma berik bolamyn, áskerı ómiriń qıyn da qyzyq sátterine tózimdilik bildirip, mindetimdi oryndaımyn degen senimdemin.
Ant qabyldamas buryn elimizdiń alys-jaqyn aımaqtarynan jınalǵan jaýyngerler áýel basta arnaıy oqý pýnktinde jattyǵady, áskerı ómirge beıimdelip, ishtegi tártippen tanysady. Ol jerde bolashaq Ulandyqtar memlekettik-quqyqtyq, saptyq daıyndyq, jalpy áskerı jarǵy, kún tártibin jattap bilimderin jetildiredi. Sonymen qatar jaýyngerlik qyzmetke túsý daǵdylaryn, atý daıyndyq tásilderin, áskerı tehnıkalar men atys qarýlaryn meńgeredi.
— Búgingi tańda 30 kúndik daıyndyqtyń nátıjesi retinde jas sarbazdarymyzdyń ant qabyldaý rásimin kórseńizder bolady. Bul jaýyngerler Qazaqstan Respýblıkasynyń 22 aımaǵynan áskerge shaqyrtylǵan.Oqý pýnktinde bolashaq sarbazdardy áskerı ómirdiń qyr-syryn úıretemiz, aldaǵy ýaqytta qyzmetterine kereginiń bárin úırenedi. Árbir sarbazben jeke suhbattasamyz, tártipke, áskerı ómirge daıyndaımyz, — deıdi Oqý pýnkti bastyǵynyń orynbasary podpolkovnık Qazbek Murataev.
Jambyl, Almaty, Aqmola, Túrkistan, OQO, SQO, ShQO oblystarynan shaqyrylǵan 700-ge jýyq jas sarbaz kópshilik aldynda eline aqtyq demi qalǵansha abyroımen qyzmet etýge sert berdi. Shara shymyldyǵy saltanatty sherýimen jabyldy. Sapqa qosylǵan jas sarbazdar endi ózge áskerı qyzmetshilermen qatarlasa qoǵamdyq tártibi men qaýipsizdigin qamtamasyz etý mindetterin oryndaıdy.
